ކެފޭ އުސޫލުން މަސްތުވާތަކެތި ވިއްކާ ގެއެއްގެ ވެރިފަރާތަށް ދައުވާކޮށްފި
ކެފޭ އުސޫލުން މަސްތުވާތަކެތި ވިއްކާ ގެއެއްގެ ވެރިފަރާތުގެ މައްޗަށް މިއަދު ޕްރޮސެކިއުޓާ ޖެނެރަލް އޮފީހުން ކްރިމިނަލް ކޯޓުގައި ދައުވާކޮށްފިއެވެ.
ޕީޖީ ޙުސެއިން ޝަމީމް މިއަދު ކުރެއްވި ޓްވީޓެއްގައި ވިދާޅުވީ ކެފޭ އުޞޫލުން މަސްތުވާތަކެތި ބޭނުންކުރަން ދޫކޮށްފައި ހުރިކަމަށް ބެލެވޭ މ.ބްރައިޓްފްލާވަރ ގޭގައި، އެކަން ހުއްޓުވުމަށް އެންގުމުން ވެސް ހުއްޓުވައިފައި ނުވާތީ، މަސްތުވާތަކެއްޗާ ބެހޭ ޤާނޫނުގެ 127 ވަނަ މާއްދާގެ (ށ) ގެ ދަށުން، އެގޭ ވެރިމީހާގެ މައްޗަށް ޖިނާއީ ކޯޓުގައި ދައުވާ އުފުލައިފައިވާ ކަމަށެވެ.
ޕީޖީ އޮފީހުން ބުނެފައި ވަނީ އެ ގޭގެ ވެރިފަރާތް ކަމުގައިވާ ހުސެއިން ޔޫސުފް ވަނީ ކެފޭ އުސޫލުން މަސްތުވާތަކެތި ވިއްކާ ވިޔަފާރި ކުރަން ހުއްދަ ދީފައި ކަމަށެވެ. އެގޮތުން އެގޭގައި މީހުން ކެފޭ އުސޫލުން ޑްރަގް ވިއްކައި ވިޔަފާރިކުރާ ކަމަށް ތުހުމަތު ކުރެވުނު މައްސަލައިގައި، އެ ގޭގައި މީހުން މަސްތުވާތަކެތި ބޭނުންކޮށް، އެ ތަކެތީގެ ވިޔަފާރިކޮށް، އެ ތަކެތި ޕެޑްލް ކުރާ ކަމަށް ގަބޫލުކުރެވޭ ކަމަށް ޕީޖީ އޮފީހުން ބުނެފައިވެއެވެ. އަދި އެކަމަކީ ވެރިފަރާތަށް ވެސް އެނގިގެން ކުރާ ކަމެއް ކަމަށް ވެސް ޕީޖީއަށް ގަބޫލު ކުރެވެއެވެ.
