އެއާޕޯޓުގައި ހުރި މީހަކަށް ސާރާއަކީ ކާކު ކަމެއް ނޭނގުނު
ބޮލީވުޑްގެ ގިނަ މަޝްހޫރު މީހުންނަކީ، އެމީހުން ކިރިޔާ ބޭރަށް ނުކުންނަ އިރަށް ފަހަތުން ޕަޕަރާޒީންގެ ފައުޖެއް އަންނަ މީހުންނެވެ. ޚާއްސަކޮށް ބޮލީވުޑްގެ އެކްޓަރުންނަށް މިކަމާ ވަރަށް ގިނައިން ކުރިމަތިލާން ޖެހެއެވެ. ޕަޕަރާޒީންގެ ސަބަބުން އެމީހަކީ މަޝްހޫރު މީހެއްކަން ވެސް ގިނަ މީހުންނަށް ފާހަގަ ކުރަން އެނގެއެވެ.
ނަމަވެސް އަރަމުން އަންނަ މަޝްހޫރު ތަރި ސާރާ ޢަލީ ޚާނަށް އިއްޔެ ކުރިމަތިވީ ވަރަށް ތަފާތު ހާދިސާއަކާއެވެ.
ސާރާގެ މަންމަ އަދި ބޮލީވުޑް އެކްޓްރެސް އަމްރިތާ ސިންގްއާ އެކީ އެއާޕޯޓަށް ސާރާ ދިޔުމުން، އާދައިގެ މަތިން ޕަޕަރާޒީން އެމީހުންގެ ފަހަތުން ކެމެރާ ހިފައިގެން ދިޔައެވެ. ސާރާ ގާތު އެމީހުން އެދެމުން ދިޔައީ ފޮޓޯއެއް ނަގަން ކެމެރާތަކަށް ބަލައިލުމަށެވެ.
ބޯޑިންގ ފާސް ނަގަން އަމްރިތާގެ ފަހަތުގައި ހުއްޓާ، ސާރާގެ ފަހަތުގައި ހުރި އުމުރުން ދުވަސްވީ ފިރިހެނެއް އޭނާއަށް ގޮވައިލަައިފައި އެހީ އޭނާއަށް ކިޔަނީ ކޮން ނަމެއްތޯއެވެ.
އެ ސުވާލުގެ ސަބަބުން ސާރާ ލަދުގަތް ނަމަވެސް، ހިނިތުންވުމާ އެކު އޭނާގެ ނަން ބުންޏެވެ. ނަން ބުނުމާ އެކު އެމީހާ ދެން ސުވާލު ކުރީ ސާރާއަކީ ކޮން މަސައްކަތެއް ކުރާ މީހެއްތޯއެވެ. ކުރިއަށް ވުރެ ބޮޑަށް ލަދުގަނެ، ހިނިތުންވުމާ އެކު ސާރާ ބުނީ އޭނާއަކީ އެކްޓްރެސްއެއް ކަމަށެވެ.
މި ހާދިސާގެ ވީޑިއޯ މިހާރު މީސްމީޑިއާގައި ދައުރުވަމުންދާއިރު، އެއްވެސް ފޮނިކަމަކާ ނުލައި ސާރާ އެ ސުވާލުތަކަށް ޖަވާބު ދިނުމުން ވަރަށް ގިނަ މީހުން ވަނީ ސާރާއަށް ތައުރީފުކޮށްފައެވެ.
