ޤާސިމް މަޖިލީހަށް ވަޑައިނުގަންނަވާތީ ނަޝީދުގެ ނުސީދާ ފާޑު ކިޔުން

ބައެއް ބޭފުޅުންނަކީ ހަލާލު ގޮތުގައި ވަރަށް ބޮޑެތި އާމްދަނީ ވެސް ލިބިވަޑައިގަންނަވާ ބޭފުޅުންކަމަށާއި ރައްޔިތުންގެ މަޖިލީހުގެ އެއްވެސް ޖަލްސާއަކަށް ވަޑައިނުގެން ދޮޅު އަހަރު ވީ މެމްބަރަކަށް ވެސް މުސާރަ ލިބެމުން އެބަދާ ކަމަށް ވިދާޅުވެ ރައްޔިތުންގެ މަޖީހުގެ މާމިގިލި ދާއިރާގެ މެމްބަރު ޤާސިމް އިބްރާހިމަށް ރައީސް ނަޝީދު ފާޑުވިދާޅުވެއްޖެއެވެ.

Ads by STELCO

މިދިޔަ މެއި މަހުގެ 6 ވަނަ ދުވަހުގެ ރޭ ރައީސް ނަޝީދަށް އަމާޒުކޮށް ދިން ނުރައްކާތެރި ޓެރަރިސްޓް ހަމަލާއަށްފަހު ފުރަތަމަ ފަހަރަށް ނޫސްވެރިންނާ ބައްދަލުކުރައްވައި ވާހަކަ ދައްކަވަމުން ރައީސް ނަޝީދު ވިދާޅުވީ އެ މަނިކުފާނު މަޖިލީހަށް ވަޑައިނުގަންނަވަނީ އެމަނިކުފާނު އަމިއްލައަށް ކުރެއްވި ކަމެއްގެ ސަބަބުން ނޫން ކަމަށެވެ.

"މުސާރައަށް ބަލާއިރު ހަމަ އެއްގޮތަކަށް ވެސް މަޖިލީހަށް ވަޑައިނުގެން ދޮޅު އަހަރެއްވީމަ ވެސް އެ މެމްބަަރަކަށް ވެސް މުސާރަ ލިބެމުންދޭ. ދެން ބައެއް ބޭފުޅުންނަކީ މި ދެންނެވިހެން ވަރަށް ބޮޑެތި އާމްދަނީ ވެސް ލިބިވަޑައިގަންނަވާ ބޭފުޅުން ހަމަ ހަލާލު އާމްދަނީ ލިބިވަޑައިގަންނަވާ." ރައީސް ނަޝީދު ވިދާޅުވިއެވެ.

މަޖިލީހަށް ވަޑައިނުގެންނެވި ނަމަވެސް މުސާރަ ނަންގަވަންތޯ ނޫސްވެރިއަކު ކުރެއްވި ސުވާލަށް ޖަވާބު ދެއްވަމުން ރައީސް ނަޝީދު ވިދާޅުވީ މުސާރަ ނަންގަވާ ކަމަށާއި މުސާރަ ނުނަންގަވާ ނަމަ ދިރިއުޅޭނެ ގޮތެއް ވެސް ނޯންނާނެ ކަމަށެވެ.

"އަޅުގަނޑު މުސާރަ ނަގަން. މުސާރަ އަޅުގަނޑު ނުނަގައިފިއްޔާ އަޅުގަނޑު ދިރިއުޅޭނެ ގޮތެއް ވެސް ނުވެސް އޮންނާނެ އަޅުގަނޑަކީ އެއްވެސް މަސައްކަތެއް ވެސް ކުރާ މީހެއް ވެސް ނޫން.އަދި އަޅުގަނޑު ދެކޭ ގޮތުގައި އަޅުގަނޑު އަމިއްލަ ކުރި ކަމަކުން ނޫން އަޅުގަނޑަށް މި ހާލަތު މެދުވެރި ވީކީއެއް. މީ މިކަން ދިމާވި ގޮތް . އަޅުަގަނޑު ދުނިޔޭގައި ހުރިކަމީ މާތް ރަސްކަލާނގެ އަމުރާއި އިރާދަފުޅުން އަޅުގަނޑުގެ ނަސީބު." ނަޝީދު ވިދާޅުވިއެވެ.

ގިނަ ދުވަސްތަކަށް ފަހު މިއަދު ރައީސް ނަޝީދު ނޫސްވެރިންނާ ބައްދަލު ކުރައްވައިފައި ވަނީ ޔޫކޭގައި ހުންނަވައި އޮންލައިންކޮށެވެ.