އަދާލަތު ޕާޓީއަކީ ސިޔާސީ މަންފާއަށް ދީން ވިއްކައިލާނެ ޕާޓީއެއް: އަދުރޭ
ދީނީ ގިނަ ޢިލްމުވެރިންތަކެއް ހިމެނިވަޑައިގަންނަވާ އަދާލަތު ޕާޓީއަކީ ސިޔާސީ މަންފާއެއް ހާސިލް ކުރުމަށް ދީން ވެސް ވިއްކައިލާނެ ޕާޓީއެއްކަން މިއަދު ރާއްޖޭގައި ކަންކަން ހިނގަމުން އަންނަ ގޮތުން އެނގޭ ކަމަށް އިދިކޮޅު ކޯލިޝަން ހިންގެވުމާ ވަގުތީ ގޮތުން ހަވާލުވެ ހުންނެވި އަބްދުއްރަޙީމް އަބްދުﷲ ވިދާޅުވެއްޖެއެވެ.
މިރޭ އިދިކޮޅު ކޯލިޝަނުން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އަދުރޭ މިހެން ވިދާޅުވީ، މިހާރު އިސްލާމް އަދި ޤުރުއާން ފޮތްތަކުގައި ޤުރުއާނުގެ ބައެއް އާޔަތްތައް ނުބައިކޮށް ޕްރިންޓްވެފައި ހުރި ހުރުމާއި އަދާލަތު ޕާޓީގެ ސްލޮޓެއްގައި އިސްލާމިކް މިނިސްޓަރު ކަމަށް ބޭފުޅަކު ހުންނެވުމާ ގުޅުވަމުންނެވެ. މިގޮތުން ވިދާޅުވީ، ފޮތްތަކުގައި ޤުރުއާނުގެ އާޔަތްތައް ނުބައިކޮށް ޕްރިންޓްވެފައި ހުރީ އެކަށީގެންވާ ވަރަށް އިސްލާމިކް މިނިސްޓްރީން އެކަންތައް ނުބެއްލެމުން ކަމަށެވެ. އަދި އެވަރުގެ ކަމެއް ނުބަލާ ދޫކޮށްލަންވީ ކީއްވެތޯ އަދުރޭ ސުވާލު ކުރެއްވިއެވެ.
"އިސްލާމިކް މިނިސްޓްރީން ވިދާޅުވެފައި އެބައޮތް އިސްލާމް ފޮތުގައި ހުރި އާޔަތްތަކަށް ބަދަލު އައިސްފައި ހުރި ހުރުމަކީ އިސްލާމިކް މިނިސްޓްރީގެ އޮންނަ ކޮމިޓީއިން ބަލަން ޖެހޭ ކަމެކޭ. ބަލަންވާ ވަރަށް ނުބެލި އޮތީމައޭ އެކަން ނުވެފައި އޮތީ. އިސްލާމިކް މިނިސްޓަރަކީ އަދާލަތު ޕާޓީއަށް ނިސްބަތްވާ ބޭފުޅެއް. ކީއްވެތޯ މިވަރުގެ ކަމެއް ބަލަންވާ ވަރަށް ނުބަލާ ދޫކޮށްލީ."
އަދުރޭ ވިދާޅުވީ " މިހާތަނަށް އައިއިރު އިސްލާމިކް މިނިސްޓަރު ދީނީ ކަމަކާ ގުޅޭ ތަޤްރީރެއް ދެއްވި އަޑެއް." ނާއްސަވާ ކަމަށެވެ. އަދާލަތުން ސިޔާސީ މަންފާއަށް ދީން ވިއްކާލައްވާނެ ކަަަމަށް ވިދާޅުވި ވިދާޅުވުމަށް އިތުރަށް ވާހަކަފުޅު ކުރިޔަށް ގެންގޮސްފައެއް ނުވެއެވެ.
ފޮތްތަކުގައި ޤުރުއާން ނުބައިކޮށް ލިޔެފައި އޮތް އޮތުމަށް އިޝާރާތް ކުރައްވާ އަދުރޭގެ ވާހަކަފުޅުގައި އިތުރަށް ވިދާޅުވީ، އެކަން އެއީ އޮޅިގެން ވެފައި އޮތް ކަމެއް ނޫން ކަމަށާއި މިއީ ގަސްދުގައި ރާވައިގެން ކޮށްފައި އޮތް ކަމެއް ކަމަށެވެ. އަދި މިއީ ތުއްތު ކުދިންގެ ސިކުނޑިތަކަށް އިސްލާމް ދީނާ ބެހޭ ތަފާތު ވިސްނުން ވައްދައިދިނުމަށް ޓަކައި ކޮށްފައި އޮތް ކަމެއް ކަަމަށް އަދުރޭ ތުހުމަތު ކުރެއްވިއެވެ. އަދި ވިދާޅުވީ، އެމްޑީޕީއިން ވެރިކަމަށް އަންނަ ކޮންމެ ފަހަރަކު އިސްލާމްދީނަށް ފުރައްސާރަ ކުރުމާއި އިސްލާމީ އުސޫލުތަކަށް ތަބާ ނުވުމާއި އިސްލާމް ދީނުގެ އެކިއެކި ކަންކަން ބަދަލު ކުރަން މަސައްކަތް ކުރާ މަންޒަރު ފެންނަމުންދާ ކަމާށެވެ. އަދި މިކަމަށް އަޑު އުފުލަން ޖެހޭ ކަަމަށްވެސް އަދުރޭ ވިދާޅުވިއެވެ.
"މިއީ މުޅި ރާއްޖެ އެކީގައި ނިކުންނަން ޖެހޭ މައްސަލައެއް. މިއީ ކުޑަކުޑަ މައްސަލައެއް ނޫން. މިއީ ވަރަށް ބޮޑު މައްސަލައެއް. ކީރިތި ޤުރުއާނަށް ބަދަލު ގެނައުމަކީ ދީނީ ގޮތުން ބަލާއިރު ވަރަށް ހަރުކަށި އަދަބު ދޭން ޖެހޭ ކަމެއްގެ ގޮތުގައި އަޅުގަނޑު ޤަބޫލު ކުރަނީ." އަދުރޭ ވިދާޅުވިއެވެ.
އަދުރޭ ވިދާޅުވީ މިމައްސަލައިގައި އެޑިއުކޭޝަން މިނިސްޓަރާއި އިސްލާމިކް މިނިސްޓަރުގެ އިތުރުން ރައީސް އިބްރާހީމް މުޙައްމަދު ޞާލިޙް ވެސް އިސްތިއުފާ ދެއްވަން ޖެހިވަޑައިގަންނަވާ ކަމަށެވެ.
Ads by STO
