ހިޔާފުލެޓަށް ބަދަލުވާ ދަރިވަރުންނަށް މާލެ-ހުޅުމާލެ ސުކޫލު ބަސް ތައާރަފް ކުރަނީ
ހުޅުމާލޭ ފޭސް 2ގައި އިމާރާތްކޮށްފައިވާ ހިޔާ ފުލެޓަށް ބަދަލުވާ ދަރިވަރުންނަށް ހާއްސަކޮށްގެން މާލޭ-ހުޅުމާލޭ ސުކޫލު ބަސް ތައާރަފްކުރަން އެޑިއުކޭޝަން މިނިސްޓްރީން ނިންމައިފިއެވެ.
އެޑިއުކޭޝަން މިނިސްޓްރީން ވިދާޅުވީ ހުޅުމާލޭ ފޭސް 2ގައި އިމާރާތްކޮށްފައިވާ ހިޔާ ފުލެޓަށް ބަދަލުވާ ދަރިވަރުންނަށް ހާއްސަކޮށްގެން މާލޭ ސުކޫލުތަކަށް ދިޔުމުގެ އިންތިޒާމުތައް ހަމަޖެއްސުމުގެ މަސައްކަތްތައް ކުރަމުންދާކަމަށާއި ސުކޫލު ބަސް ތައާރަފް ކުރުމުގެ މަޝްވަރާތައް އެމްޓީސީސީއާ އެކު ކުރެވެމުންދާކަމަށެވެ.
ހުޅުމާލޭ ފޭސް 2ގަައި އިމާރާތްކޮށްފައިވާ ހިޔާ ފުލެޓްތަކަށް މީހުން ބަދަލުވާން ފަށައިފައިވާއިރު އެ ފޭސްގައި އަދި ސުކޫލުތައް ފަދަ ޒަރޫރީ ބޭނުންތައް ލިބޭނޭ ގޮތް މަގުފަހިވެފައެއް ނުވެއެވެ. އެހެން ނަމަވެސް ހިިޔާ ފުލެޓުތަކަށް ގިނަ މީހުން ބަދަލުވާން ފަށަން ވާއިރަށް އެހިދުމަތްތައް ލިބޭނެ އިންތިޒާމް ހަމަޖައްސައި ދިނުމަށް ހައުސިން ޑިވެލޮޕްމަންޓް ކޯޕަރޭޝަނުން ދަނީ މަސައްކަތް ކުރައްވަމުންނެވެ.
ހުޅުމާލެ ދެވަނަ ފިޔަވަހީގައި 14 ސްކޫލެއް އިމާރާތް ކުރަން ވަނީ ނިންމައިފައެވެ. އޭގެ ތެރެއިން ދެ ސުކޫލެއް އެޅުމުގެ މަސައްކަތް މިހާރު ވަނީ ކޮންޓްރެކްޓަރުންނާ ޙަވާލުކޮށްފައެވެ.
މީގެ އިތުރުން ހުޅުމާލެ ދެވަނަ ފިޔަވަހީގައި ތަރައްގީ ކުރަމުން އަންނަ ބަސް ސްޓޮޕްތައް ނިމޭން ކައިރިވެފައިވާ ކަމަށް އެޗްޑީސީން ވަނީ މީގެ ކުރިން ވިދާޅުވެފައެވެ. އެގޮތުން ދެވަނަ ފިޔަވަހީގައި ބަހުގެ ހިދުމަތް ފެށުމަށް ހަދަމުން އަންނަ ބަސް ސްޓޮޕްތަކުގެ 92 ޕަސެންޓް މަސައްކަތް މިހާރު ނިމިފައިވާ ކަމަށް އެޗްޑީސީން ހާމަކޮށްފައިވެއެވެ.
Ads by STO
