ޖިންސީ ގޯނާގެ ތުހުމަތު ކުރެވޭ ފުލުސް މީހާ ސަސްޕެންޑު ކޮށްފި
އުމުރުން 16 އަހަރުގެ ކުޑަ ކުއްޖަކަށް ޖިންސީ ގޯނާ ކުރި ކަމުގެ ތުހުމަތުގައި އައްޑޫސިޓީ ހިތަދޫން ހައްޔަރުކުރި ފުލުސް މީހާ ސަސްޕެންޑު ކޮށްފިއެވެ.
ކުޑަ ކުއްޖަކަށް ޖިންސީ ގޯނާކުރުމުގެ ތުހުމަތުގައި އުމުރުން 34 އަހަރުގެ އެ ފުލުސްމީހާ މިދިޔަ ބުރާސްފަތި ދުވަހުގެ ރޭ ހައްޔަރުކުރީ އޭނާ ހައްޔަރުކުރަން ގޮވައިލައި، ގިނަ ބަޔަކު ހިތަދޫގައި މުޒާހަރާ ކުރަމުން ދަނިކޮށެވެ. އަދި އޭނާ ޝަރީއަތް ނިމެންދެން ބަންދުގައި ބަހައްޓަން ކޯޓުން ވަނީ އަމުރުކޮށްފައެވެ.
ފުލުހުންގެ ވަޒީފާގައި ހުރި އެ މީހާ ސަސްޕެންޑު ކުރިއިރު ހުރީ ސަބް އިންސްޕެކްޓާ އޮފް ޕޮލިސްގެ ރޭންކްގައެވެ.
އެ މައްސަލަ ފުލުހުން ދަނީ ތަހުގީގު ކުރަމުންނެވެ.
ތުހުމަތު ކުރެވޭ ފުލުސް މީހާ އެ ކުއްޖާ ރޭޕް ކުރަމުން ދިޔައީ ކުއްޖާގެ އުމުރުން 14 އަހަރުން ފެށިގެން ކަމަށާއި މިހާރު އެ ކުއްޖާގެ އުމުރުން 16 އަހަރު ކަމަށް މައުލޫމާތު ލިބެއެވެ.
އެ ކުއްޖާ ރޭޕް ކުރި ކަމަށް މީހާ ކަމަށް ބުނެ މީގެ ދުވަސްކޮޅެއް ކުރިން ފެށިގެން މީސް މީޑިއާގައި އަންނަނީ މީހެއްގެ ފޮޓޯ އާންމު ވަމުންނެވެ. އެ ޕޯސްޓުގައި ބުނެފައި ވަނީ ކުޑަކުއްޖާ ރޭޕް ކުރި މަންޒަރު ފެނުނީ އޭނާގެ އަންހެނުންނަށް ކަމަށާއި އެ ފުލުސް މީހާ ހައްޔަރު ކުރުމަށެވެ.
