ހިޔާ، ރައްޔިތުންނަށް އަނިޔާއަކަށް ހެދީ މި ސަރުކާރުން: މޭޔަރ މުއިއްޒު
ކުރީ ސަރުކާރުން ނިންމައިފައިވާ ބޯހިޔާވަހިކަމުގެ އެންމެ ބޮޑު މަޝްރޫއުކަމުގައިވާ ހިޔާ މަޝްރޫއު ،އަނިޔާއަކަށް ހަދައިފައި ވަނީ މި ސަރުކާރުން ކަމަށާއި އަނިޔާއަކަށްވާ ގޮތަށް ހިޔާ މަޝްރޫގެ ކަންކަން ކުރިއަށް ގެންދިޔައީ މި ސަރުކާރުގެ ކުންފުނިތަކުންކަމަށް މާލޭ ސިޓީގެ މޭޔަރ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައްޔިތުން މަޖިލީހުގެ ޕެޓިޝަން ކޮމިޓީގައި ވާހަކަފުޅު ދައްކަވަމުން މޭޔަރ މުއިއްޒު ވިދާޅުވީ ރައީސް ޔާމީންގެ ސަރުކާރުގައި ހިޔާ މަޝްރޫގެ އިންޓްރެސްޓް ރޭޓްތައް ހުރީ އެންމެ ގިނަ ވެގެން ވެސް ހަތަރު ޕަސަންޓަށް ވުރެ ދަށްކޮށް ކަމަށާއި ނަމަވެސް މި ސަރުކާރުން ފްލެޓްގެ އަގުތައް ރައްޔިތުންނަށް އޮޅޭ ގޮތަށް ބޮޑުކޮށްފައިވާ ކަމަށެވެ.
މީގެ އިތުރުން ރައީސް އަބްދުﷲ ޔާމީންގެ ސަރުކާރުން ހުޅުމާލެ ދެވަނަ ފިޔަވަހީގައި 15،000އަށް ވުރެ ގިނަ ހައުސިން ޔުނިޓްގެ މަސައްކަތް ފަށައި އަދި ގިނަ މަސައްކަތްތަކެއް އެސަރުކާރުގައި ނިންމައިފައިވާ ކަމަށް ވެސް މޭޔަރ މުއިއްޒު ވިދާޅުވިއެވެ. އެހެން ނަމަވެސް މިމަޝްރޫއުތައް އަނިޔާއަކަށް ބަދަލު ކުރީ މި ސަރުކާރުން ކަމަށާއި ރައްޔިތުންނަށް އަނިޔާއަކަށްވާ ގޮތަށް ހިޔާ މަޝްރޫގެ ކަންކަން ކުރިއަށް ގެންދިޔައީ މި ސަރުކާރުގެ ކުންފުނިތަކުންކަމަށް ވެސް އޭނާ ވަނީ ވިދާޅުވެފައެވެ.
ހިޔާ މަޝްރޫއުއާ ގުޅޭގޮތުން އިތުރަށް ވާހަކަ ދައްކަވަމުން މޭޔަރ ވިދާޅުވީ ފްލެޓްތަކުގެ މަހު ކުލި ބޮޑު ވަނީ މި ސަރުކާރުން ހިޔާ ފްލެޓްތަކުގެ އިންޓްރަސްޓް ރޭޓް 6.8އަށް މަތިކޮށްފައި ވުމުން ކަމަށެވެ.
Ads by STO
