ސާޅި އަޅައިގެން އިންޑިޔާގެ ރެސްޓޯރެންޓަކަށް ނުވަދެވުމުން ރިޗާ ރުޅިގަދަ ވެއްޖެ
އިންޑިޔާގެ ސަގާފީ ހެދުމެއްކަމުގައިވާ ސާޅި އަޅައިގެން އިންޑިޔާގެ ދިއްލީގެ ރެސްޓޯރެންޓަކަށް ނުވަދެވުމުން ބޮލީވުޑްގެ އެކްޓްރެސް ރިޗާ ޗައްދާ ރުޅި ގަދަވެއްޖެއެވެ.
ސާޅި އަޅައިގެން ރެސްޓޯރެންޓަށް ނުވަދެވުމުން ރިޗާ ރުޅިގަދަވި ވީޑިޔޯއެއް ސޯޝަލް މީޑިޔާގައި މިހާރު ދަނީ ދައުރުވަމުންނެވެ. އެކުއިލާ ނަމަކަށް ކިޔާ މިރެސްޓޯރެންޓަށް ސާޅި އަޅައިގެން ވަނުމަށް މަސައްކަތް ކުރި އަންހެނަކު އެތަނަށް ނުވެއްދި ސަބަބު އެތަނުގެ މުއައްޒަފެއް ގާތުން އެހުމުން ޖަވާބުގައި ބުނެފައި ވަނީ އެރެސްޓޯރެންޓަށް ވަދެވެނީ ހަމައެކަނި ސްމާރޓް ކެޝުއަލް ހެދުމުގައި ކަމަށާއި ސްމާރޓް ކެޝުއަލް ހެދުންތަކުގެ ތެރޭގައި ސާޅި ނުހިމެނޭ ކަމަށެވެ.
ރިޗާ ވަނީ ނުރުހުމާއެކު މި ވީޑިއޯ ޓްވިޓާގައި ހިއްސާކޮށްފައެވެ. އެއާއެކު އިންޑިޔާގެ ގިނަ ރައްޔިތުންގެ ނުރުހުން ވަނީ މި ރެސްޓޯރެންޓަށް އަމާޒުވެފައެވެ. މިގޮތުން އެއްބަޔަކު ބުނެފައި ވަނީ މިފަދަ ރެސްޓޯރެންޓްތައް އިންޑިޔާގައި ހުރެގެން ވެސް ނުވާނެކަމަށާއި މި ރެސްޓޯރެންޓްގެ ލައިސެންސް ކެންސަލް ކުރުމަށެވެ.
ރިޗާގެ ވީޑިޔޯ އެކު ރެސްޓޯރެންޓަށް ނުރުހުމާއި ފުރައްސާރަ އަމާޒުވެފައިވާއިރު މި ރެސްޓޯރެންޓަށް އިންޑިޔާގެ ޒޮމާޓޯ އެޕްލިކޭޝަނުގައި "ބޮމްބްޑް ރިިވިއު"ވަނީ ލިބިފައެވެ. އަދި އެރެސްޓޯރެންޓްގެ އެގްރިގޭޓް ރޭޓިންގ ވަނީ 2 ސްޓާގައިކަމަށް ވެސް އިންޑިޔާގެ މީޑިޔާތަކުން ބުނެއެވެ.
ކާމިޔާބު ތަރި ރިޗާ ސޯޝަލް މީޑިޔާއަށް ދޫކޮށްލާ ކޮންމެ އެއްޗަކީ އޭނާގެ ބޮޑު ފޭން ބޭސްއިން ބަލަމުން އަންނަ އެއްޗަކަށްވާއިރު ރިޗާ ދޫކޮށްލި މި ވީޑިޔޯއާ އެކު މިރެސްޓޯރެންޓަށް މީޑިޔާތަކުގެ ސަމާލުކަން ވަނީ ވަރަށް ބޮޑަށް ލިބިފައެވެ.
