ގިނަ އަދަދެއްގެ އުޅަނދު ޕާކު ކުރެވޭނެ އިތުރު ޕާކިން ޒޯނެއް މާލޭގައި ތަރައްޤީ ކުރަނީ

ސައިކަލާއި ކާރު ޕާކު ކުރެވޭނެ ޖާގަ ހިމެނޭހެން، މާލޭގެ އަލިމަސް ކާނިވާ ސަރަޙައްދުގައި 500އަށް ވުރެ ގިނަ އުޅަނދު ޕާކު ކުރެވޭނެ ޕާކިން ޒޯނެއް ތަރައްޤީކުރުމުގެ މަސައްކަތް މާލޭ ސިޓީ ކައުންސިލުން މިއަދު ފަށައިފިއެވެ.

Ads by STELCO

ޕާކިން ޒޯނާ ގުޅޭގޮތުން ސިޓީ ކައުންސިލުން މަޢުލޫމާތު ދީފައިވާ ގޮތުގައި ކާނިވާ ސަރަޙައްދުގައި ހަދާ މި ޕާކިން ޒޯނަކީ 500 ސައިކަލު ޕާކުކުރެވޭނެ ޖާގައާ އެކު ތަރައްޤީކުރާ ޒޯނެކެވެ. އަދި ޒޯނުގެ ބައެއްގައި ކާރު ޕާކިންއަށް ޚާއްސަކުރުމަށް ވެސް ނިންމައިފައި ވެއެވެ. ކާރު ޕާކިން ޒޯންގައި 55 ކާރު ޕާކު ކުރެވޭނެއެވެ.

މާލޭ ސިޓީ ކައުންސިލުން ފެށި ޕާކިން ޒޯންގެ މި މަސައްކަތް ވެގެންދާނީ އެއް ސަރަޙައްދުގައި އެންމެ ގިނަ އުޅަނދު ޕާކު ކުރެވޭގޮތަށް ޚާއްސަކޮށްގެން މާލޭގައި ހަދާ އެއް ޕާކިން ޒޯނަށެވެ.

މާލޭގައި ދުއްވާ އެއްގަމު އުޅަނދުތައް އިތުރުވުމުގެ ސަބަބުން ކުރިމަތިވާ އެންމެ ބޮޑު ދަތިކަމަކީ އުޅަނދުތައް ޕާކުކުރާނެ ޖާގަ ނެތުމެވެ.

މާލޭގެ މަގުތަކުގައި ޕާކު ކުރުމަށް ކުރަހައިފައިވާ ސަރަޙައްދުތަކުގެ އިތުރުން، ހުސްކޮށް ހުރި ބިންތައް ޕާކިން ޒޯންތަކަށް ބަދަލުކުރުމުގެ މަސައްކަތް މާލޭ ސިޓީ ކައުންސިލުން އަންނަނީ ކުރަމުންނެވެ. އެ ކައުންސިލުން ވަނީ ގިނަ ބިންތަކެއް ޕާކިންއަށް ޚާއްސަކޮށް، ވަނީ ހުޅުވައިފައެވެ.