ނޭޝަނަލް ޕާޓީ އުފެއްދުމަށް ބާއްވާ ޖަލްސާ ބޭއްވުމުގެ ހުއްދަ ދީފި
މޯލްޑިވްސް ނޭޝަނަލް ޕާޓީގެ ނަމުގައި ރައްޔިތުންގެ މަޖިލީހުގެ މެމްބަރުންތަކެއް އުފެއްދުމަށް މަސައްކަތް ކުރަމުން އަންނަ ޕާޓީ އުފެއްދުމުގެ ޖަލްސާ ބޭއްވުމުގެ ހުއްދަ އިލެކްޝަން ކޮމިޝަނުން ދީފިއެވެ.
އެމްއެންޕީ އުފެއްދުމުގެ ހުއްދަ އެ ޕާޓީއަށް އިލެކްޝަނުން ދީފައި ވަނީ މިއަދުއެވެ.
އެޕާޓީ އުފެއްދުމަށް މިމަހުގެ 17 ވަނަ ދުވަހު ހުށަހެޅީ 5000 މީހުންގެ ސޮޔާ އެކުއެވެ. އެ ޕާޓީން އިލެކްޝަނަށް ހުށައެޅި ފޯމުތަކުގެ ތެރެއިން ސައްހަ ނުވަނީ ނިސްބަތުން ވަރަށް މަދު ފޯމެއްކަމަށް އިލެކްޝަނުން ބުނެއެވެ.
އެމްއެންޕީ އުފެއްދުމުގެ މަޤްޞަދަކީ ދިވެހީންގެ ތެރޭގައި ޤައުމީ ފިކުރު ދިވެހީން އެދޭ ކަންކަން ފުރިހަމައަށް ހާސިލްކުރުމަށް ޓަކައި، ޤާނޫނީ ގޮތުން ލިބިދޭ އެންމެހައި ބާރާއި އިޚްތިޔާރާއި ޙައްޤުތައް ހޯދުމާއި 2023ވަނަ އަހަރުގެ ރިޔާސީ އިންތިޚާބު ކާމިޔާބު ކުރުމަށް ކުރަންޖެހޭ ހުރިހާ މަސައްކަތެއް ކުރުން ކަމަށް އެމްއެންޕީން ވިދާޅުވިއެވެ.
މީގެ އިތުރުން އެ ބަޔާނުގައި ވިދާޅުވެފައި ވަނީ ޕާޓީގެ އަމާޒަކީ މިހިނގާ 2021ވަނަ އަހަރު ނިމުމުގެ ކުރިން ދިހަ ހާސް (10,000) މެންބަރުން ހަމަކޮށް އެމްއެންޕީއަކީ ދިވެހިރާއްޖޭގައި ހިންގާ އެންމެ ވަރުގަދަ ސިޔާސީ ހަރަކާތަށް ހެދުން ކަމަށެވެ.
މިދިޔަ ދެ މަސްދުވަހުގެ ތެރޭގައި އެމްއެންޕީއާ ގިނަ އަދަދެއްގެ މެންބަރުން ގުޅެމުން ދިޔަ ކަމަށް އެ ޕާޓީން ވިދާޅުވެއެވެ. އޭގެ ތެރޭގައި ސިޔާސީ، އިޖްތިމާޢީ، އިޤްތިޞާދީ އަދި ތަޢުލީމީ ދާއިރާއިން ގިނަ ތަޖްރިބާތަކެއް ހޯއްދަވައިފައިވާ ބޭފުޅުން ހިމެނެއެވެ.
ކުރީގެ ޑިފެންސް މިނިސްޓަރ އަދި ދަނގެތި ދާއިރާގެ މެމްބަރު މުހައްމަދު ނާޒިމް އިސްކޮށް ހުންނަވާ އުފައްދަވާ އެމްއެންޕީ އުފެއްދުމުގެ ހުއްދަ އިލެކްޝަންސް ކޮމިޝަނުން ދެއްވައިފައި ވަނީ 15 ޖުލައި 2021 ވީ ދުވަހުއެވެ.
Ads by STO
