ސްޕްރީމް ކޯޓުން ރައީސް ޔާމީންގެ މައުސޫމްކަން ސާބިތުވާނެ: ޣައްސާން
ސްޕްރީމް ކޯޓުން ރައީސް އަބްދުﷲ ޔާމީންގެ މައުސޫމްކަން ހާމަވާނެ ކަމަށް ޕީޕީއެމްގެ ނައިބު ރައީސް މުހައްމަދު ޣައްސާން މައުމޫން ވިދާޅުވެއްޖެއެވެ.
ޣައްސާން މިފަދައިން ވިދާޅުވީ ކަފާލާތުގެ ދަށުން ރައީސް ޔާމީން މިނިވަން ކޮށްދެއްވުމަށް ސުޕްރީމް ކޯޓަށް ހުށައަޅައިފައިވާ ގޮތަށް ރައީސް ޔާމީން މިނިވަން ކޮށްދެވެން ނެތްކަމަށް ސްޕްރީމް ކޯޓުން މިއަދު ނިންމުމާ ގުޅިގެންނެވެ.
ޣައްސާން ކުރެއްވި ޓްވީޓެއްގައި ވިދާޅުވީ ރައީސް ޔާމީންގެ މައުސޫމްކަން ހާމަވާނެ ކަމަށާއި 2023ގައި ރައީސް ޔާމީން އަލުން ވެރިކަމަށް ގެނެވޭނެ ކަމުގެ އުންމީދު ބޮޑުކަމަށެވެ.
”އިންޝާﷲ ސްޕްރީމް ކޯޓުން ރައީސް ޔާމީންގެ މައުސޫމްކަން ސާބިތުވާނެ. ރައްޔިތުންގެ ލޯތްބާއި، ތާއީދުން، މާތް ﷲ އިރާދަ ކުރެއްވިއްޔާ 2023ގައި ރައީސުލްޖުމްހޫރިއްޔާ ކަމަށް ޕީޕީއެމްގެ ގަދަ މަސައްކަތުން އިންތިޚާބު ކުރާނަން” ޣައްސާން ވިދާޅުވިއެވެ.
ރައީސް ޔާމީންގެ މައްޗަށް އިއްވައިފައިވާ ޖަލު ހުކުމް ތަންފީޒް ކުރުން ފަސްކޮށްދީ، ކަފާލާތުގެ ދަށުން އެ މަނިކުފާނު ދޫކޮށްލަން ރައީސް ޔާމީންގެ ޤާނޫނީ ވަކީލުންގެ ޓީމުގެ ހުށަހަޅައިފައި ވަނީ ސެޕްޓެމްބަރު މަހުގެ 12 ވަނަ ދުވަހުއެވެ.
ރައީސް ޔާމީންގެ މައްޗަށް ކްރިމިނަލް ކޯޓުން އިއްވައިފައި ވަނީ، ފަސް އަހަރު ދުވަހަށް ޖަލަށް ލުމަށާއި 70 މިލިއަން ރުފިޔާއިން ޖޫރިމަނާ ކުރުމަށެވެ. އެއީ މަނީލޯންޑަރ ކުރުމުގެ ކުށް ސާބިތުވާކަމަށް ކަނޑައަޅައިގެންނެވެ.
