އަސްލަމްގެ ގޭގައި ރޯކޮށްލަން އުޅުނީ ނާޒިލްކަމަށް ތުހުމަތު ކުރައްވައިފި
ރައްޔިތުން މަޖިލީހުގެ ހިތަދޫ އުތުރު ދާއިރާގެ މެމްބަރު މުހައްމަދު އަސްލަމްގެ ގޭގައި އަލިފާން ރޯކޮށްލަން މަސައްކަތް ކޮށްފައި ވަނީ، އެމްޑީޕީގެ ހިތަދޫ ދެކުނު ދާއިރާގެ މެންބަރު ނާޒިލްގެ އެންގުމަށް ކަމަށް މެންބަރު އަސްލަމްގެ އަނބިކަނބަލުންގެ ކޮއްކޯފުޅު އަދި ޕީޕީއެމްގެ ކައުންސިލް މެންބަރު ޒާހިދު ރަމީޒު ތުހުމަތު ކުރައްވައިފިއެވެ.
މެމްބަރު އަސްލަމްގެ ގޭގައި ރޭގެ ވަގުތެއްގައި ރޯކޮށްލަން މަސައްކަތް ކޮށްފައި ވަނީ، ހިތަދު ދެކުނު ދާއިރާގެ މެމްބަރު އިބްރާހިމް ނާޒިލް މެމްބަރު އަސްލަމަށް ޖިންސީ ގުނަވަން ދެއްކި ކަމަށް ބުނާ މައްސަލައެއް މަޖިލީހަށް ހުށަހަޅައިފައި ވަނިކޮށެވެ.
ޒާހިދު މިއަދު ކުރެއްވި ޓުވީޓެއްގައި ވިދާޅުވީ، މެންބަރު ނާޒިލް ދެކެ ކުޑަކޮށް ވެސް ބިރު ނުގަންނަ ކަމަށެވެ. އަދި ނާޒިލް ކިތަންމެ ވަރަކަށް ހަކުރު (މަސްތުވާތަކެތި) ވިއްކިޔަސް ކުޑަކޮށް ވެސް ނާޒިލް ދެކެ ޖެހިލުން ނުވާ ކަމަށް ޒާހިދު ވިދާޅުވިއެވެ. މީގެ އިތުރުން ޒާހިދު ވިދާޅުވީ މެންބަރު އަސްލަމްއާ ޖެހުނު މައްސަލައެއްގައި ރޯކޮށްލީ އޭނާ ހަދައިފައި ހުރި އޭނާގެ ގެއެއްގައި ކަމަށެވެ.
މައުލޫމާތު ލިބިފައިވާ ގޮތުގައި މެމްބަރު އަސްލަމްގެ އަނބިކަނބަލުން އައްޑޫގައި ދިރިއުޅުއްވާ ގޭގައި ރޯކޮށްލަން މަސައްކަތް ކޮށްފައި ވަނީ، އެ ގޭގެ ދޮރުތަކަށް ތެޔޮ އެޅުމަށް ފަހުއެވެ. ނަމަވެސް އެ ވަގުތު ވާރޭ ވެހެމުގެ ސަބަބުން އަލިފާންގަނޑު ވަނީ ނިވިފައެވެ.
