ކަޅު ބާޒާރުގައި ޓިކެޓެއްގެ އަގު 2،000 ރުފިޔާއަށް
ސާފް ޗެމްޕިއަންޝިޕުގައި މާދަމާ ރޭ ބަނގްލަދޭޝްއާ ދެކޮޅަށް ރާއްޖެ ކުޅޭ މެޗަށް ކަޅު ބާޒާރުގައި ޓިކެޓެއް ވިއްކާ އަގު 2،000 ރުފިޔާއަށް އަރައިފިއެވެ.
ޓިކެޓްގެ އަގު ބޮޑުވެފައި މިވަނީ މާދަމާރޭ ކުޅުމަށް ހަމަޖެހިފައިވާ ރާއްޖެ އަދި ބަނގްލަދޭޝް ބައްދަލުކުރާ މެޗު ބަލަން ވަންނަން އެދޭ ބަނގްލަދޭޝްގެ ގިނަ މީހުންނަށް ޓިކެޓް ނުލިބިވަނިކޮށެވެ. ދުނިޔޭގެ ހުރިހާ މުބާރާތްތަކެކޭ އެއްފަދައިން ސާފް މުބާރާތުގެ ޓިކެޓް ވިއްކުމަށް ހަމަޖެހިފައި ވަނީ ވެސް ހޯމް ސަޕޯޓަރުންނާއި އަވޭ ޓީމުގެ ސަޕޯޓަރުންނަށް ކަނޑައަޅައިފައި އޮންނަ ވަކި އިންސައްތައެއްގެ ޓިކެޓެވެ. އެ ގޮތުން ބުރާސްފަތިދުވަހުގެ ރޭ ކުޅޭ މެޗަށް ބަނގްލަދޭޝްގެ ސަޕޯޓަރުންނަށް ވިއްކުމަށް ހަމަޖައްސައިފައި ވަނީ 200 ޓިކެޓެވެ.
އެ ހުރިހާ ޓިކެޓެއް މިހާރު ވިކި ހުސްވެފައިވާ ކަމަށާއި ދިވެހި ސަޕޯޓަރުންނަށް ވިއްކުމަށް ހަމަޖެހިފައިވާ ޓިކެޓެއްގައި ބިދޭސީއަކަށް ދަނޑަށް ނުވަދެވޭ ގޮތަށް އަދި ބިދޭސީއަކަށް ވިއްކާ ޓިކެޓެއްގައި ދިވެއްސަކަށް ދަނޑަށް ނުވެދެވޭ ގޮތަށް ހަމަޖައްސައިފައި ވަނީ ދެސަބަބަކާ ހުރެ ކަމަށް އެފްއޭއެމުން ވިދާޅުވެއެވެ.
އެގޮތުން ބްލެޓް މާކެޓުގައި ޓިކެޓް ވިއްކުން ހުއްޓުވުން އެއީ އެއް ބޭނުން ކަމަށާއި މިހާރު ވެސް ބަނގްލަދޭޝްގެ ރައްޔިތުންނަށް 1000އާއި 2000ރ.އާ ދެމެދުގެ އަދަދަށް ޓިކެޓް ވިއްކާކަމުގެ ޝަކުވާ އެ އެސޯސިއޭޝަނަށް ލިބިފައިވާ ކަމަށް އެފްއޭއެމްއިން ވިދާޅުވެއެވެ. އަދި އެއީ އެ އެސޯސިއޭޝަނުން ހިތްވަރުދޭ ކަމެއް ނޫންކަން ފާހަގަކުރިއެވެ.
އެފްއޭއެމުން ވިދާޅުވީ ދުނިޔޭގެ ހުރިހާ ހިސާބެއްގައި ވެސް ހޯމް ޓީމުގެ ސަޕޯޓަރުންނަށް ކުޅިބަލަން ވަނުމަށް ވަރަށް ތަނަވަސް ފުރުސަތުތަކެއް ދީފައިވާ ކަމަށެވެ. މި ގޮތުން އަވޭ ޓީމަށް ވިއްކަނީ އެމުބާރާތެއްގެ ގަވާއިދުގައިވާ ގޮތުގެ މަތީން ކަނޑައަޅައިފައިވާ އަދަދެއްގެ ޓިކެޓްކަމަށް އެފްއޭއެމުން ވިދާޅުވިއެވެ.
