ޝާހިދުގެ ވައުދުތައް ފުއްދުމަށް ދިވެހި ސަރުކާރުން ފުރިހަމަ އެއްބާރުލުން ދޭނެ: ރައީސް
އދ ގެ 76 ވަނަ އާންމު މަޖިލީހުގެ ރައީސް އަދި ދިވެހިރާއްޖޭގެ ފޮރިން މިނިސްޓަރ އަބްދުالله ޝާހިދުގެ ވައުދުތައް ފުއްދުމަށް ޓަކައި ރާއްޖެއިން ފުރިހަމަ އެއްބާރުލުން ދޭނެ ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެއެވެ.
ރައީސް މިފަދައިން ވިދާޅުވެފައި ވަނީ އ.ދ.ގެ ޢާންމު މަޖިލީހުގެ 76 ވަނަ ސެޝަނުގެ ރައީސް ޢަބްދުﷲ ޝާހިދު ރާއްޖެއަށް ކުރެއްވި ރަސްމީ ދަތުރުފުޅުގައި ރައީސުލްޖުމްހޫރިއްޔާއާއި އ.ދ.ގެ ޢާންމު މަޖިލީހުގެ 76 ވަނަ ސެޝަނުގެ ރައީސް ބައިވެރިވެވަޑައިގެން ބޭއްވެވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުންނެވެ.
މި ބައްދަލުކުރެއްވުން ކުރިއަށް ގެންގޮސްފައި ވަނީ މިއަދު ހެނދުނު ރައީސުލްޖުމްހޫރިއްޔާގެ އޮފީހުގައެވެ.
ނޫސްވެރިންނާ ބައްދަލުކުރައްވައި ރައީސުލްޖުމްހޫރިއްޔާ ވަނީ ރަސްމީ ބައްދަލުކުރެއްވުމުގައި މަޝްވަރާ ކުރެއްވި ކަންތައްތަކުގެ މައްޗަށް އަލިއަޅުއްވައިލައްވައިފައެވެ. އެގޮތުން ދިވެހިރާއްޖެއާއި އ.ދ.ގެ ގުޅުން އިތުރު ހަރުފަތަކަށް ގެންދިއުމާ ގުޅޭގޮތުން ޚިޔާލު ބަދަލުކުރައްވާފައިވާ ކަމުގައި އެ މަނިކުފާނު ވިދާޅުވިއެވެ. އަދި އ.ދ. އިސްލާހުކުރުމުގެ މަސައްކަތްތައް ޢަބްދުﷲ ޝާހިދުގެ ޒައާމަތުގައި އިތުރަށް ހަލުވިކޮށްދެއްވުމަށް ދަންނަވައިފައިވާނެ ކަމަށާއި ޚާއްސަ ގޮތެއްގައި އ.ދ. ގެ ޢާންމު މަޖިލީހާއި ސަލާމަތީ މަޖިލިސް އިސްލާހުކުރުމުގެ މަސައްކަތްތަކަށް ކުރިއެރުމެއް ލިބުމަކީ މުހިންމުކަމެއް ކަމުގައި އެ މަނިކުފާނު ފާހަގަކުރައްވާފައިވާނެކަމުގައި ވެސް ވިދާޅުވިއެވެ.
މީގެ އިތުރުން ބައިނަލްއަޤްވާމީ މުޖުތަމަޢުގައި ދިވެހިރާއްޖެ އިސްކަންދޭ މުހިންމު ދާއިރާތަކާ ގުޅޭގޮތުން ވެސް މަޝްވަރާކުރައްވާފައިވާކަމަށް އެ މަނިކުފާނު ވިދާޅުވިއެވެ. އެގޮތުން މޫސުމަށް އަންނަ ބަދަލުތަކާ ގުޅިގެން ދިވެހިރާއްޖެ ފަދަ ކުދި ޖަޒީރާ ޤައުމުތަކަށް ކުރިމަތިވަމުންދާ ނުރައްކާތަކުން ސަލާމަތްވުމަށް ޓަކައި ހުރިހާ ޤައުމުތަކެއް ޝާމިލުވާ ނިޒާމެއްގެ ތެރެއިން ކުރެވިދާނެ މަސައްކަތްތަކާ ގުޅޭގޮތުން މަޝްވަރާ ކުރައްވައިފައިވާކަން އެ މަނިކުފާނު ފާހަގަކުރެއްވެވިއެވެ.
ހަމަ އެއާއެކު ކޮވިޑްގެ ސަބަބުން އިޤްޠިސާދީ ގޮތުން އެންމެ ބޮޑު ގެއްލުމެއް ލިބެމުންދާ ކުދި ޖަޒީރާ ޤައުމުތަކަށް ލުޔެއް ހޯދައި ދިނުމުގައި އ.ދ. ގެ ޢާންމު މަޖިލީހުގެ ދައުރުގެ މުހިންމުކަން ރައީސުލްޖުމްހޫރިއްޔާ ފާހަގަކުރައްވާފައިވެއެވެ. އަދި ކޮވިޑް-19 ގެ ބަލިމަޑުކަމުން އަރައިގަތުމަށް އ.ދ. ގެ ދައުރު މުހިންމު ކަމަށާއި، ހުރިހާ ޤައުމުތަކަށް ހަމަހަމަ ގޮތެއްގައި ވެކްސިން ފޯރުކޮށްދެއްވުމަށް ޕީ.ޖީ.އޭއިން ގެންގުޅުއްވާ ސިޔާސަތަށް ރައީސުލްޖުމްހޫރިއްޔާ ވަނީ މަރުހަބާ ދަންނަވައިފައެވެ. މީގެ އިތުރުން މި ބައްދަލުކުރެއްވުމުގައި އެމަނިކުފާނު ވަނީ ކޮވިޑްގެ ބަލިމަޑުކަމުގެ ތެރޭގައި އ.ދ.އިން ރާއްޖެއަށް ދިން އެހީއަށް ޝުކުރު ދަންނަވައިފައެވެ.
މި ނޫސްވެރިންގެ ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ޒުވާނުން ޒިންމާކުރުމަށް އ.ދ.އިން ކުރާ މަސައްކަތް ފާހަގަކުރައްވައިފައެވެ. އަދި ޢަބްދުﷲ ޝާހިދުގެ ދައުރުގައި ރާއްޖޭގެ ޒުވާނުންނަށް އިތުރު ފުރުޞަތު ފަހިވެގެން ދާނެކަމަށް އުންމީދުކުރައްވާ ކަމަށާއި، އ.ދ. އޮފީހުގައި ދިވެހި ޒުވާނުން މަސައްކަތްކުރަން ފުރުޞަތު ލިބިގެން ދާނެކަމަށް އުންމީދުކުރައްވާކަމުގައި އެ މަނިކުފާނު ވިދާޅުވިއެވެ.
އ.ދ.ގެ ޢާންމު މަޖިލީހުގެ 76 ވަނަ ސެޝަނުގެ ރައީސްގެ ވާހަކަފުޅުގައި އެމަނިކުފާނު ވަނީ ރާއްޖެއިން އެމަނިކުފާނަށާއި އެމަނިކުފާނުގެ އަރިހުގައި ވަޑައިގެންނެވި ވަފުދަށް ކިޔުއްވި ހޫނު މަރުހަބާއަށް ޝުކުރުއަދާކުރައްވައިފައެވެ. އަދި އެމަނިކުފާނު ވަނީ ރާއްޖެއަކީ ކުޑަ ޤައުމެއްކަމުގައި ވިޔަސް ރާއްޖެއަށް އ.ދ. ގެ ޢާންމު މަޖިލީހުގެ 76 ވަނަ ސެޝަނުގެ ރައީސްކަމުގެ ގޮނޑި ކާމިޔާބުވުމަކީ ބައިނަލްއަޤުވާމީ ކޮމިއުނިޓީގައި ރާއްޖެ ބަލައިގެންފައިވާކަމުގެ ހެއްކެއްގެ ގޮތުގައި ފާހަގަކުރައްވައިފައެވެ. އަދި ރާއްޖެއަކީ އަބަދުވެސް ޖޯޝާއި ފޯރީގައި އުންމީދާ އެކު ކުރިމަގު އުޖާލާކުރުމަށް ވަރަށް ބުރަކޮށް މަސައްކަތްކުރާ ޤައުމެއްކަން އެމަނިކުފާނުގެ ވާހަކަފުޅުގައި ވަނީ ފާހަގަކުރައްވައިފައެވެ. އަދި އެގޮތަށް ޖޯޝާއި ފޯރީގައި އުންމީދާއެކު އެމަނިކުފާނު މަސައްކަތް ކުރައްވާނެކަމުގައި ވިދާޅުވިއެވެ.
އަދި ކޮވިޑް-19ގެ ހާލަތުން އަރައިގަތުމަށް އ.ދ. އިން ގަދައަޅައި މަސައްކަތް ކުރާނެ ކަމަށާއި އަދި މޫސުމަށް އަންނަ ބަދަލުތައް ކުޑަކުރުމަށް ޤައުމުތަކުން ގުޅިގެން މަސައްކަތްކުރަން ޖެހިފައިވާކަން ފާހަގަކުރައްވައި އެކަމަށް ހާއްސަ އިސްކަމެއްދީގެން މަސައްކަތްކުރައްވާނެ ކަމުގައި އެމަނިކުފާނު ވިދާޅުވިއެވެ.
އ.ދ.ގެ ޢާންމު މަޖިލީހުގެ 76 ވަނަ ސެޝަނުގެ ރައީސްގެ ވާހަކަފުޅު ނިންމަވައިލައްވަމުން ދިވެހިންގެ ނަމާއި ޝަރަފާ ފަޚުރު ދެމެހެއްޓުމަށް ޓަކައި ހިފެހެއްޓުމެއް ނެތި މަސައްކަތްކުރައްވަމުން ގެންދަވާނެ ކަމުގައި އެމަނިކުފާނު ވިދާޅުވިއެވެ. އަދި އ.ދ.ގެ ޢާންމު މަޖިލީހުގެ ރައީސަކަށް ވުމުގެ ފުރުޞަތު ދިވެއްސަކަށް ލިބިގެން ދިޔައީ ރައީސުލްޖުމްހޫރިއްޔާގެ ޚާރިޖީ ސިޔާސަތުގެ ހަރުދަނާކަމުންކަމުގައި އެމަނިކުފާނު ފާހަގަކުރެއްވެވިއެވެ.
