ހިޔާ ފުލެޓްގެ ކުލި 6،600އަށް ކުޑަކުރުމުން ކޮންމެ ފުލެޓަކުން 1.1 މިލިއަން ގެއްލުންވާނެ: އޮޑިޓް

ހިޔާ ފުލެޓްތަކުގެ ކުލި 6،600 ރުފިޔާއަށް ކުޑަ ކުރުމުން ކޮންމެ ފުލެޓަކުން 1.1 މިލިއަން ރުފިޔާގެ ގެއްލުންވާނެކަމަށް އޯޑިޓް ރިޕޯޓުން ދައްކައިފިއެވެ.

Ads by Hajj Corporation

ރައީސް ޔާމީނުގެ ސަރުކާރުން ހިޔާ ފުލެޓުގެ ކުލީގެ ގޮތުގައި 6،600 ރުފިޔާ ނަގަން ނިންމައިފައިވީ ނަމަވެސް މި ސަރުކާރުން ވަނީ އެ އަގަށް ބަދަލުގެނެސް ހިޔާ ފުލެޓުގެ ކުލީގެ ގޮތުގައި މަހަކު 7500 އަދި މެއިންޓެނެންސް ފީގެ ގޮތުގައި އިތުރު 1000 ރުފިޔާއާ އެކު ޖުމްލަ 8500 ރުފިޔާ ދައްކަން ޖެހޭނެކަމަށް ނިންމައިފައެވެ.

އެހެން ނަމަވެސް ހިޔާ ފުލެޓުތަކުގެ ވެރިންނާއި އިދިކޮޅުން ބުނަމުންދާ ގޮތުގައި މި އަދަދަކީ އެފުލެޓްތަކާއި އަޅާބަލާއިރު ބޮޑު އަދަދެއްކަމަށާއި ކުލީގެ އަގު ކުޑަކުރުމަކީ ކޮންމެހެން މުހިންމުކަމެއް ކަމަށެވެ.

އޮޑިޓު އޮފީހުން ނެރުނު ރިޕޯޓްގައި ބުނީ ކުރީގެ ސަރުކާރުން ނިންމައިފައިވާގޮތަށް ހިޔާ ފުލެޓުގެ ކުލި 6،600އަށް ކުޑަކުރުމުން 25 އަހަރުގެ މުއްދަތަކަށް ބަލާ އިރު، އެއްވެސް ޑީފޯލްޓެއް ނެތި ހުރިހާ ޔުނިޓުތަކުން ޖުމްލަ ލިބޭނެ ކަމަށް އަންދާޒާކުރާ ފައިސާއިން ކުރަން ޖެހޭ ހަރަދުތައް ކެނޑުމުން ނެޓް-ކޭޝްފްލޯގެ ގޮތުގައި 1.3 މިލިއަން ރުފިޔާގެ ޑެފިސިޓެއް ވާނެ ކަމަށް އަންދާޒާކުރެވޭ ކަމަށެވެ.

ހިޔާ ފުލެޓްތައް ލިބުނު މީހުން  މިހާރު ދަނީ އެ ފްލެޓްތަކުގައި އާބާދުވަމުންނެވެ. އެފުލެޓުތަކުގެ ކުލީގެ ގޮތުގައި ނަގަން ހަމަޖެހިފައިވާ އަދަދަށް ލުއި ދިނުމަށް ފުލެޓުތަކުގެ ވެރިންނާއި އިދިކޮޅުން ދަނީ ހުއްޓުމެއް ނެތި ގޮވައިލަމުންނެވެ.