ޒެނީޝާއަށް ދައުވާ ކުރަނީ ޒާތީވެގެން: ޝިޔާމް
ކުރީގެ ޖެންޑާ މިނިސްޓަރ އައިމިނަތު ޒެނީޝާ ޝަހީދު ޒަކީއާ މެދު ދައުވާކުރަނީ ޒާތީ ވެގެން ކަމަށާއި އެ ކަމަނާގެ ހުރިހާ ވަގުތެއް ހޭދަކުރެއްވީ އިލްމާއި ތަޖުރިބާގެ އަލީގައި އެ ދާއިރާގައި ހުރި މައްސަލަތައް ހައްލު ކުރައްވަން ކަމަށް ޕީޕީއެމްގެ ނައިބު ރައީސް އަދި ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެެވެ.
ޝިޔާމް ވިދާޅުވީ ރައީސް ޔާމީންގެ ވެރިކަމުގެ 5 އަހަރުގެ ހިއްސާދާރުން ފަހާ ދުވުމަކީ އެމްޑީޕީގެ ރިޔާސީ ވައުދެއް ކަމަށާއި މިއީ ޒާތީވުން ކަމަށެވެ.
"ރައީސް ޔާމީން އަދި އެމަނިކުފާނުގެ އުޖާލާ 5 އަހަރުގެ ހިއްސާދާރުން ފަހާ ދުވުން އެއީ އެމްޑީޕީގެ ރިޔާސީ ވައުދެއް. ކުރީގެ ޖެންޑާ މިނިސްޓަރ ޒެނީޝާގެ ހުރިހާ ވަގުތެއް ހޭދަ ކުރެއްވީ އިލްމާއި ތަޖުރިބާގެ އަލީގައި އެ ދާއިރާގައި ހުރި މައްސަލަތައް ހައްލު ކުރައްވަން. މީ ވެސް ޒާތީ ކަމަކަށް ނޫނީ ނުވާނެ" ޝިޔާމް މިއަދު ކުރެއްވި ޓްވީޓެއްގައި ވިދާޅުވިއެވެ.
ޒެނީޝާއާ ދެކޮޅަށް ހިއުމަން ރައިޓްސް ކޮމިޝަން (އެޗްއާރްސީއެމް)އަށް ހުށަހެޅި މައްސަލައެއް އެ ކޮމިޝަނުން ތަހުގީގު ކުރުމަށް ފަހު ވަނީ ޕީޖީއަށް ފޮނުވައިފައެވެ. މި މައްސަލައިގައި ޒެނީޝާއާއި ފުލުހުންގެ ފެމިލީ އެންޑް ޗައިލްޑް ޕްރޮޓެކްޝަން (އެފްސީޕީ)ގެ ވެރިޔާ ޗީފް ސުޕްރިންޓެންޑެންޓް އޮފް ޕޮލިސް މުހައްމަދު ބަޝީރުގެ އިތުރުން ޖެންޑާ މިނިސްޓްރީގެ ބައެއް މުވައްޒަފުންނާއި ބައެއް ފުލުހުންގެ މައްޗަށް ވެސް ދައުވާ ކުރަން ފޮނުވައިފައިވެއެވެ. ނަމަވެސް އެ މައްސަލަ ޕީޖީއަށް ފޮނުވި ވަކި ދުވަހެއް އެ އެޗްއާރްސީއެމުން ބުނެފައެއް ނުވެއެވެ.
