ރާއްޖޭގައި އިގްތިޞާދީ މިނިވަންކަމެއް ނެތް: އަދުރޭ
އަވައްޓެރި އިންޑިއާ ފިޔަވައި އެހެން އެއްވެސް ގައުމެއްގެ އެހީތެރިކަން ރާއްޖެއަށް މިއަދު ބަލައިގަނެވެނީ އިންޑިއާ ސަރުކާރުން އެކަމަށް އެއްބަސްވާނަމަކަމަށް އިދިކޮޅު ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
ނަސްރުގެ ދުވަހާ ގުޅިގެން އިދިކޮޅު ޕީޕީއެމްއިން ބޭއްވި ޖަލްސާއެއްގައި ވާހަކަ ދައްކަވަމުން އަބްދުއްރަހީމް ވިދާޅުވީ މިނިވަންކަމުގެ ދިފާއުގައި ދިވެހިން މިއަދު މި ނިކުންނަނީ އޭގައި ސަބަބުތަކެއް އޮވެގެން ކަމަށެވެ. އެގޮތުން އިގްތިސޯދީ ގޮތުން ރާއްޖެއަށް ބޭރުގެ ފަރާތެއްގެ އެހީ ބޭނުންވާ ނަމަ އެންމެ ފުރަތަމަ ޖެހެނީ އިންޑިއާ ސަރުކާރުގެ ރުހުން ހޯދަންކަމަށް ވިދާޅުވިއެވެ. އިންޑިއާއިން މިހާރު ނަގާ ލޯނުތަކުގައި ކަނޑައަޅައިފައިވާ އިންޓަރެސްޓު ރޭޓަށް ވުރެ ކުޑަ ރޭޓެއްގައި އެހެން ގައުމަކުން ލޯނު ދޭން ހުށަހެޅި ނަމަވެސް އިންޑިއާއިން އެއްބަސްވުމުން ނޫނީ އެކަން ކުރެވެން ނެތުމުން ރާއްޖޭގައި އިގްތިސޯދީ މިނިވަންކަން ނެތްކަން ދޭހަވާކަމަށް އަބްދުއްރަހީމް ވިދާޅުވިއެވެ.
"އަޅުގަނޑުމެންގެ ގައުމުގަ ޕްރޮޖެކްޓެއް ހިންގެން އޮތީ އެމީހުން (އިންޑިއާއިން) ހުއްދަ ދީގެން. އެ ޕްރޮޖެކްޓު ވަކި ބަޔަކާ ހަވާލު ކުރެވެން އޮތީ ވެސް އެމީހުން ހުއްދަ ދީގެން. އެހެންވީމަ އަޅުގަނޑު މި ދަންނަވަނީ ދިވެހިރާއްޖޭގަ މިއަދު އިގްތިސޯދީ މިނިވަންކަމެއް ނެތޭ" ރާއްޖެއާއި އިންޑިއާގެ ގުޅުމަށް ވަރަށް ބޮޑަށް ފާޑު ވިދާޅުވަމުން އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ އިގްތިސޯދީ މިނިވަންކަމުގެ އިތުރުން ދާހިލީ މިނިވަންކަން ވެސް ރާއްޖޭގައި މިއަދު ނެތް ކަމަށެވެ. އެގޮތުން ރާއްޖޭގައި ބަންދުކުރަން ޖެހޭ މަގުތަކާއި ގޯޅިތައް ވެސް ކަނޑައަޅަނީ އިންޑިއާގެ ސަފާރާއިންކަމަށް އޭނާ ވިދާޅުވިއެވެ. އަދި މީޑިއާތަކަށް ފިޔަވަޅު އަޅަންވީމައި ވެސް އެކަން އަންގަނީ ވެސް އިންޑިއާގެ ސަފީރުކަމަށް ވިދާޅުވިއެވެ.
މިއަދު ރާއްޖޭގެ މިނިވަންކަން ގެއްލިގެން މިދަނީ ފެއިލްވެފައި އޮތް ހާރިޖީ ސިޔާސަތުގެ ސަބަބުންކަމަށް އަބްދުއްރަހީމް ވަނީ ވިދާޅުވެފައެވެ. ވަކި ގައުމެއް ބޭނުންވާ ގޮތަށް ހާރިޖީ ސިޔާސަތު ބައްޓަން ކުރުމުގެ ސަބަބުން ބައިނަލްއަގުވާމީ ދުނިޔޭގައި ރާއްޖެ އެކަހެރިވެގެން ގޮސްފައިވާކަމަށް ވެސް އަބްދުއްރަހީމްގެ ވާހަކަފުޅުގައި ވިދާޅުވިއެވެ.
"އެހެންވީމަ މިދެންނެވި މައިގަނޑު ސަބަބުތަކަށް ޓަކައި ދިވެހިން މިނިވަންކަމުގެ ދިފާއުގަ ނިކުންނަން މިޖެހުނީ. މިސަރުކާރުގަ ދިވެހިރާއްޖޭގެ މިނިވަންކަން ދެމެހެއްޓުމުގެ ގާބިލުކަން ނެތީމަ" އިދިކޮޅުން "މިނިވަންކަމުގެ ދިފާއުގައި" މިނަމުގައި ކުރިއަށް ގެންދާ ކެމްޕެއިނާ ގުޅޭ ގޮތުން އަބްދުއްރަހީމް ވިދާޅުވިއެވެ.
އިތުރަށް އޭނާ ވިދާޅުވީ މިއުޅެނީ ދިވެހި އަސްކަރިއްޔާގައި ގާބިލުކަން ނެތިގެން ނޫން ކަމަށެވެ. އަދި 2018ވަނަ އަހަރު ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހުގެ ކެމްޕެއިނަށް އިންޑިއާއިން ފަންޑުކުރިކަމަށް ދެކެވޭ ވާހަކައަށް އިޝާރާތް ކުރައްވައި ޢަބްދުއްރަޙީމް ވިދާޅުވީ މިއަދުގެ ސަރުކާރަކީ އަމިއްލަ ބާރުވެރިކަން އޮވެގެން ވެރިކަން ކުރާ ސަރުކާރެއް ނޫން ކަމަށާއި މި ސަރުކާރު އައިސް މިއޮތީ ބައެއްގެ މަދަދާއި އެހީތެރިކަމާ އެކީގައި ކަމަށެވެ.
ނަސްރުގެ ދުވަހުގެ މުނާސަބަތުގައި އިދިކޮޅުން ބޭއްވި ޖަލްސާގައި އަބްދުއްރަހީމް ވަނީ ނަސްރުގެ ދުވަސް ބީ ކެޓެގަރީގެ ދުވަހެއްގެ ގޮތުގައި ސަރުކާރުން ފާހަގަކުރާތީ އެކަމަށް ފާޑުވިދާޅުވެފައެވެ. އެގޮތުން ވިދާޅުވީ ގައުމީ ދުވަހަކީ އޭ ކެޓެގަރީގެ ދުވަހަކަށް ވާނަމަ ނަސްރުގެ ދުވަސް ވެސް އޭ ކެޓެގަރީގައި ހިމެނެން ޖެހޭނެ ކަމަށެވެ.
Ads by STO
