އިންޑިއާގެ 75 ސިފައިން ރާއްޖޭގައި، ޑޯނިއާ ދުއްވާނީ އަދިވެސް އިންޑިއާ ސިފައިން
ދިވެހި އަސްކަރިއްޔާގައި ބޭނުންކުރާ ހެލިކޮޕްޓަރާއި ޑޯނިއާ މަތިންދާ ބޯޓުތައް ދުއްވުމަށް ރާއްޖޭގައި އެގައުމުގެ 75 އޮފިޝަލުން ގާއިމުވެ ތިބޭކަން ރާއްޖެއާއި އިންޑިއާ ދެމެދު ވެފައިވާ އެއްބަސްވުމުން ހާމަވެއްޖެއެވެ.
ރައްޔިތުންގެ މަޖިލީހުގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީއަށް ހުށައަޅައިފައިވާ މައްސަލައަކާ ގުޅިގެން ރޭ ޑިފެންސް މިނިސްޓަރ މާރިޔާ އަހުމަދު ދީދީއާއި ޑިފެންސްގެ އިސްވެރިން ވަނީ އެކޮމިޓީއަށް ހާޒިރުކޮށްފައެވެ. މިބައްދަލުވުމުގައި އާންމުކޮށް ހުޅުވައިލައިގެން ބޭއްވި ބައިގައި ދެ އެއްބަސްވުމާ ގުޅޭ ޕްރެޒެންޓޭޝަނެއް ވަނީ ދައްކައިފައެވެ. ސިއްރުކޮށްގެން ބޭއްވި ބައިގައި ދެ އެއްބަސްވުން ވެސް ވަނީ ކޮމިޓީގެ މެންބަރުންނަށް ދައްކައިފައެވެ.
މިބައްދަލުވުމުގައި މިނިސްޓަރ މާރިޔާ ވިދާޅުވީ އިޑްރޯގްރަފީ އެގްރިމަންޓާއި ޑޯނިއާ އެގްރިމަންޓަކީ ވެސް 2016ގައި ރާއްޖެއާއި އިންޑިއާއިން އެކުލަވައިލި އެކްޝަން ޕްލޭންގެ ދަށުން ހެދި އެއްބަސްވުންތަކެއް ކަމަށެވެ.
މިގޮތުން އެއްބަސްވުމުގައިވާ ގޮތުން ޑޯނިއާ އެއާކްރާފްޓް އެއްވެސް ކަމެއްގައި އުދުހެން ބޭނުން ކަމުގައި ވާނަމަ، އެކަން ކުރެވޭނީ އެމްއެންޑީއެފްގެ ފަރާތުން ހުއްދަ ލިބިގެން، ޗީފް އޮފް ޑިފެންސް ފޯސްގެ އޮތަރައިޒޭޝަންއާ އެކު، ކޯސްޓްގާޑް ކޮމާންޑުގެ ޓާސްކިން އޯޑަރަކާ އެކުގައި ކަމަށް އެމްއެންޑީއެފްގެ ޕްލޭންސް، ޕޮލިސީ އެންޑް ރިސޯސް މެނޭޖްމަންޓްގެ ޕްރިސިޕަލް ޑިރެކްޓަރު، ލެފްޓިނެންޓް ކާނަލް ހަސަން އާމިރު ކޮމިޓީ ބައްދަލުވުމުގައި ވިދާޅުވިއެވެ.
ޑޯނިއާ ބޯޓުގެ އޮޕަރޭޝަންގައި ރާއްޖޭގައި ގާއިމްވެގެން ތިން ޕައިލެޓުންނާއި އޮބްޒާވަރާ އެކު 21 ޓެކްނިކަލް މީހުން ހިމެނޭހެން އިންޑިއާގެ 25 މީހުން ތިބޭނެ ކަމަށް އެމްއެންޑީއެފްއިން ކޮމިޓީގައި ވަނީ ހާމަކޮށްފައެވެ. މީގެއިތުރުން އިންޑިއާގެ ދެ ހެލިކަޕްޓަރު އޮންނަ ދެ ސަރަހައްދުގައި، ކޮންމެ ތަނެއްގައި އިންޑިއާގެ 25 މީހުން ރާއްޖޭގައި ތިބޭނެ ކަމަށް އެމްއެންޑީއެފްއިން ކޮމިޓީގައި ވަނީ ބުނެފައެވެ. މިއާއެކު ޖުމްލަ 75 އޮފިޝަލުން ރާއްޖޭގައި ގާއިމުވެ ތިބެއެވެ.
ދިވެހި އަސްކަރިއްޔާގެ ޑޯނިއާ މަތިންދާ ބޯޓުތައް ފުރަތަމަ ފަހަރަށް ދިވެހި ޕައިލެޓުން ދުއްވަން ފަށައިފައި ވަނީ މިމަހުގެ 9 ވަނަ ދުވަހުއެވެ.
Ads by STO
