3 ޤައުމެއްގެ އައު ސަފީރުން ފަތްކޮޅު އަރުވައިފި
3 ޤައުމެއްގެ އައު ސަފީރުން، ސަފީރުކަމުގެ ފަތްކޮޅު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް އަރުވައިފިއެވެ.
ރައީސް ޞާލިޙަށް މިއަދު ފަތްކޮޅު އެރުއްވީ ނިއުޒިލޭންޑާއި، ފިލިޕީންސްގެ އިތުރުން، ނައިޖީރިއާއިން ރާއްޖެއަށް ކަނޑައެޅުއްވި ސަފީރުންނެވެ.
މިއަދު މެންދުރު ރައީސުލްޖުމްހޫރިއްޔާގެ އޮފީހުގައި ބޭއްވެވި މި ރަސްމިއްޔާތުގައި، ފަތްކޮޅު އެރުވުމަށް ފަހު، ނިއުޒިލޭންޑްގެ އައު ސަފީރު މައިކަލް އެޑްވަރޑް އެޕަލްޓަންއާ ރައީސުލްޖުމްހޫރިއްޔާ ބައްދަލުކުރައްވައި، އެމަނިކުފާނު ސަފީރުކަމާ ހަވާލުވެވަޑައިގަތުމާ ގުޅިގެން މަރުޙަބާ ވިދާޅުވިއެވެ. އަދި ރާއްޖެއާއި ނިއުޒިލެންޑާ ދެޤައުމުގެ ސިޔާސީ ގުޅުން ޤާއިމުކުރިތާ 47 އަހަރު ފުރުން ފާހަގަކުރައްވައި ނިއުޒިލެންޑަކީ ރަނގަޅު އެކުވެރިއެއްގެ އިތުރުން ރަނގަޅު ބައިވެރިއެއްކަމުގައި ދެކޭކަމަށް ފާހަގަ ކުރެއްވިއެވެ.
ފިލިޕީންސްގެ އައު ސަފީރު އެލަން އެލް ޑެނިއެގާއާއި ރައީސުލްޖުމްހޫރިއްޔާ ބައްދަލު ކުރައްވައި ދެ ޤައުމުގައި ހުރި ޚިޔާލު އެއްގޮތް ކަންތައްތަކާ ގުޅޭގޮތުން މަޝްވަރާކުރައްވައިފައި ވެއެވެ. އެގޮތުން އެ ދެބޭފުޅުން ވަނީ ދެ ޤައުމުގެ މިހާރުގެ ކޮވިޑްގެ ޙާލަތާއި، މޫސުމަށް އަންނަ ބަދަލުތަކާއި، އޭގެ ނާޒުކުކަމާއި، ދެޤައުމުގެ ރައްޔިތުންގެ މެދުގައި އޮންނަ ގުޅުމާ ގުޅޭ ގޮތުން ވާހަކަފުޅު ދައްކަވައިފައެވެ.
މީގެ އިތުރުން ނައިޖީރިޔާގެ އައު ސަފީރު އަބިއޮޔޭ މުޙައްމަދު ބެއްލޯ ރައީސް ޞާލިޙާ ބައްދަލު ކުރައްވައި ރާއްޖެއާއި ނައިޖީރިއާއާ ދެޤައުމުގެ ދެމެދުގައި އޮތް ގާތް ގުޅުން އިތުރަށް ބަދަހިކުރެއްވުމަށް މަސައްކަތް ކުރައްވާނެ ކަމުގައި ވިދާޅުވެފައި ވެއެވެ.
