ދިވެހީން އެކައުންޓިން ދާއިރާއަށް ޝައުގުވެރި ކުރުވުން މުހިންމު: ރައީސް
ރާއްޖޭގައި އެކައުންޓެންސީގެ ދާއިރާ ކުރިއެރުމަކީ ކޮރަޕްޝަން ހުއްޓުވުމަށް ލިބޭ ވަރަށް ބޮޑު ބާރަކަށް ވާނެ ކަމަށާއި އެހެން ނަމަވެސް ރާއްޖޭގެ އެކައުންޓިންގ ދާއިރާގައި ގިނަ އަދަދަކަށް ބިދޭސީން ހަރަކާތްތެރިވަމުން އަންނަ ކަމަށް ރައީސުލް ޖުމްހޫރިއްޔާ އިބްރާޙީމް މުޙައްމަދު ޞާލިޙް ވިދާޅުވެއްޖެއެވެ.
މިއަހަރުގެ ޗާޓަޑް އެކައުންޓެންޓުންގެ ފޯރަމް އިފްތިތާހުކުރުމުގެ ޖަލްސާ ޝަރަފުވެރިކޮށްދެއްވައި ވާހަކަފުޅު ދައްކަވަމުން ރައީސް ވިދާޅުވީ، އެކައުންޓެންސީ ދާއިރާގައި ދިވެހިން ތަމްރީނުކޮށް، ފަންނީ ޤާބިލު މީހުން އިތުރުކުރުމަކީ ސަރުކާރުގެ އަމާޒެއް ކަމަށެވެ. އަދި މިކަމަށް މަސައްކަތް ކުރައްވަމުން ގެންދަވާކަން ފާހަގަ ކުރައްވަމުން ރައީސް ވިދާޅުވީ، މިދިޔަ އަހަރު އަމަލުކުރަން ފެށި ދިވެހިރާއްޖޭގެ ޗާޓަޑް އެކައުންޓެންޓުންގެ ގާނޫނަކީ އޭގެ ފެށުން ކަމަށެވެ.
ޗާޓަޑް އެކައުންޓެންޓުންގެ ގާނޫނުގެ ދަށުން އެކައުންޓިން ދާއިރާގެ ކަންކަން ހިންގުމާއި އަމިއްލަ ނަމުގައި ދައުވާކުރުމާއި ދައުވާ ލިބިގަތުމުގެ ބާރުދީ، އަމިއްލަ ނަމުގައި މުއާމަލާތުކުރުމުގެ ހައިސިއްޔަތު ދީ އަދި ވަކި ސިއްކައެއް އޮންނަ މިނިވަން، މުސްތަގިއްލު މުއައްސަސާއެއްވަނީ އުފައްދައިފައެވެ.
ރައީސްގެ ވާހަކަފުޅުގައި އިތުރަށް ވިދާޅުވީ، ރާއްޖޭގެ އިޤްތިޞާދު ކުރިއަރަމުން އަންނަ ވަރަކަށް މި ދާއިރާގެ ވެސް ތަފާތު ވަޒީފާތައް އުފެދެމުން އަންނަ ކަމަށެވެ. އަދި ދައުލަތާއި ޕްރައިވެޓް ސެކްޓާގެ މާލީ ކަންކަމާއި ޓެކްސްގެ ކަންކަން ބަލަހައްޓާނެ އެކައުންޓެންޓުންނާއި އޮޑިޓަރުންގެ ދައުރު އިތުރަށް ފުޅާކުރުމުގެ ބޭނުންތެރިކަން މިހާރު ބޮޑުވެފައިވާ ކަމަށްވެސް ރައީސް ވިދާޅުވިއެވެ. އެހެން ނަމަވެސް، މި ދާއިރާގައި 4،500 ބިދޭސީ މަސައްކަތްތެރިން ހަރަކާތްތެރިވަމުން އަންނަކަން ފާހަގަ ކުރައްވަމުން ރައީސް ޞާލިޙް ވިދާޅުވީ، މި ދާއިރާއަށް ދިވެހި ޒުވާނުން ޝައުޤުވެރި ކުރުވަން ޖެހޭ ކަމަށެވެ.
"ރާއްޖޭގައި ކުރެވޭ މާލީ މުޢާމަލާތްތައް، ޚާއްސަކޮށް ދައުލަތުގެ މާލީ މުޢާމަލާތްތައް އޮޑިޓްކޮށް ބެލެހެއްޓުމުގެ މަސައްކަތް ފެށިފައި ވަނީ މީގެ 65 އަހަރު ކުރިން. މިއަދާ ހަމައަށް އައިއިރު، އޮޑިޓިންގއާއި އެކައުންޓެންސީގެ ދާއިރާ މިއޮތީ ވަރަށް ބޮޑަށް ބަދަލުވެފައި، އަދި ކޮންމެވެސް ވަރަކަށް ތަރައްޤީވެފައި. އެހެން ނަމަވެސް، މިދާއިރާގައި ދިވެހިންނަށް ވުރެ ގިނަ ކަމަށް ފާހަގަ ކުރެވެނީ ބިދޭސީ އެކައުންޓެންޓުން،" ރައީސް ޞާލިޙް ވިދާޅުވިއެވެ.
ދެން ތި ހުރިހާ ކަމެއް ވެސް ކުރަށްވާންވީނޫންތޯ. ކާކުތޯ ބުނީ ނުކުރާށޭ. އަޅުގަނޑުމެންތޯ ކުރާންވީ، މަނިކުފާނު ހަވާލުވެ ވަޑައިގަންނަވަނީ ހަމައެކަނި މުސާރަފުޅާތޯ.