އައްޑޫގެ ތަރައްޤީއާ ގުޅޭގޮތުން ރައީސް މަޝްވަރާކުރައްވައިފި
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު، އައްޑޫ ސިޓީ ކައުންސިލާއި ބައްދަލުކުރައްވައި، ސިޓީ ކައުންސިލަރުންގެ ހުރި ކަންބޮޑުވުންތައް އޮޅުންފިލުއްވައިފިއެވެ.
އިއްޔެ ހަވީރު އާރަށުގައި ކުރިޔަށްގެންދެވި މިބައްދަލުކުރެއްވުމުގައި ކައުންސިލަރުން ވަނީ އައްޑޫ ސިޓީގެ ކުރިއެރުމަށް ޓަކައި މިހާރަށް އެންމެ މުހިއްމު ކަންތައްތަކާ ބެހޭ މަޢުލޫމާތު ރައީސުލްޖުމްހޫރިއްޔާއަށް ދަންނަވައިފައެވެ.
އެގޮތުން އެ ބައްދަލުކުރެއްވުމުގައި ކައުންސިލަރުން ފާހަގަކުރެއްވި ކަންކަމުގެ ތެރޭގައި ކައުންސިލަށް ޤާނޫނީ ގޮތުން ބާރު ލިބިފައި ވިޔަސް އެކަމުގައި ދިމާވާ ގޮންޖެހުންތައް ހައްލުކުރުމަށް މަސައްކަތްކުރަން ޖެހިފައިވުމާ، މުނިސިޕަލް ޚިދުމަތްތައް ދިނުމުގައި ދިމާވާ ގޮންޖެހުންތަކާއި، ބޯހިޔާވަހިކަމުގެ މައްސަލައާއި އެކި ޚިދުމަތްތައް ދިނުމުގައި ހުރި ދަތިތަކުގެ އިތުރުން އައްޑޫ ސިޓީގައި ޓޫރިޒަމް ތަރައްޤީ ކުރުމަށް ހުރި ގޮންޖެހުންތަކާއި ޞިއްޙީ ދާއިރާ އިތުރަށް ހަރުދަނާ ކުރުމަށް ކުރެވެންހުރި ކަންތައްތަކުގެ އިތުރުން އެ ސިޓީގެ ޢުމްރާނީ ތަރައްޤީއަށް ބޭނުންވާކަންކަން ހިމެނެއެވެ.
މި ބައްދަލުކުރެއްވުމުގައި ކެބިނެޓުގެ ބައެއް ވަޒީރުން ވަނީ ކައުންސިލަރުން ފާހަގަކުރެއްވި މަޝްރޫޢުތަކާ ބެހޭ މަޢުލޫމާތު އޮޅުންފިލުވައިދެއްވައި، މަޝްރޫޢުތައް ކުރިއަށް ގެންދެވުމުގައި ސަރުކާރުން ގެންގުޅުއްވާ ވިސްނުން ސާފުކޮށްދެއްވައިފައެވެ.
މި ބައްދަލުވުމުގައި ރައީސުލްޖުމްހޫރިއްޔާ ވަނީ ކައުންސިލަރުން ފާހަގަކުރެއްވި ކަންކަމުގައި ސަރުކާރުގެ އިދާރާތަކާއި ސަރުކާރު ހިއްސާވާ ކުންފުނިތައް މެދުވެރިކޮށް އެދެވޭ ހައްލެއް ހޯއްދަވަން މަސައްކަތް ކޮށްދެއްވާނެކަމުގައި ވިދާޅުވެފައެވެ. މި ބައްދަލުކުރެއްވުމުގައި އައްޑޫ ސިޓީއަށް ނިސްބަތްވާ މަޖިލީސް މެންބަރުންނާއި ބައެއް ވަޒީރުން ވެސް ބައިވެރިވެވަޑައިގެންނެވިއެވެ.
