ރައީސް ޔާމީން މިނިވަންވުން: އެތައް ބައެއްގެ ހޫނު މަރުހަބާއާ އެކު، އެމަނިކުފާނަށް ކީރިތި ކުރެއްވުން
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް މިއަދު ސުޕްރީމް ކޯޓުން މިނިވަން ކުރުމާ އެކު، އެމަނިކުފާނު އެނބުރި ގެކޮޅަށް ވަޑައިގަތް މަގުމަތީ އެތައް ސަތޭކަ ބަޔަކު ހޫނު މަރުހަބާއެއް ދަންނަވައިފިއެވެ.
އެމްއެމްޕީއާރްސީގެ ޚިޔާނާތާ ގުޅިގެން ދައުލަތުން ކުރި މަނީ ލޯންޑަރިންގެ ދައުވާ ސާބިތުވާ ކަމަށް ނިންމައި އެމަނިކުފާނު ފަސް އަހަރު ދުވަހަށް ޖަލަށް ލާން ކްރިމިނަލް ކޯޓުން ހުކުމް ކުރީ 2019 ވަނަ އަހަރުގެ ނޮވެމްބަރު މަހުގެ 28ވަނަ ދުވަހުއެވެ. އެހުކުމް އިސްތިއުނާފު ކުރުމަށް ހައިކޯޓަށް ހުށަހެޅުމުން، އެ ކޯޓުން ވެސް ވަނީ ކްރިމިނަލް ކޯޓުގެ ނިންމުމަށް ތާއީދު ކޮށްފައެވެ.
ހައިކޯޓުގެ ހުކުމް އިސްތިއުނާފު ކުރަން ސުޕްރީމް ކޯޓަށް ހުށަހެޅުމުން، އެ ކޯޓުން މިއަދު ވަނީ ރައީސް ޔާމީން މިނިވަން ކޮށްފައެވެ.
އިދިކޮޅު ކޯލިޝަންގެ ލީޑަރު ރައީސް ޔާމީން އެނބުރި ގެކޮޅަށް ވަޑައިގަތް މަގުމަތީގައި އެމަނިކުފާނަށް ގިނަ އަދަދެއްގެ ރައްޔިތުން މަރުހަބާ ދަންނަވައިފައިވާ އިރު، އެމަނިކުފާނު މި ވަގުތު ގެންދަވަނީ އެ މީހުންނާ ސަލާމް ކުރައްވަމުންނެވެ. އަދި އެވަގުތުކޮޅުގައި އެ މަނިކުފާނު ވަނީ ވަރަށް ބޮޑަށް އުފާކުރައްވައިފައެވެ. އެ ވަގުތު އެމަނިކުފާނުގެ ލޯފުޅުން ކަރުނަހިލިގެން ދިޔަތަން ވެސް ވަނީ ފެނިގެން ގޮސްފައެވެ.
ސުޕްރީމް ކޯޓުގައި މައްސަލަ ބެއްލެވި ތިން ފަނޑިޔާރުންގެ އިއްތިފާގުން ކުރި ހުކުމުގައި ފާހަގަކޮށްފައިވާ އެންމެ މުހިންމު އެއް ކަމަކީ، ވޮޑަމުލާގެ ފައިސާ އެސްއޯއެފަށް ޖަމާކުރި ކަމަށް ބުނާ ޗެކް ނަންބަރު ދިމާނުވާތީ ރައީސް ޔާމީންގެ އެކައުންޓަށް ޖަމާވީ ދައުލަތުގެ ފައިސާ ކަމާ މެދު ޝައްކު އުފެދޭ ހާލަތެއް އޮތުމެވެ.
ދައުލަތުން ޔާމީނަށް ކުރި ދައުވާގައި ބުނާ ގޮތުގައި ޔާމީންގެ އެކައުންޓަށް ޖަމާވީ ދައުލަތަށް ލިބެން ޖެހޭ ފައިސާކަމަށެވެ. އެހެން ނަމަވެސް އެކަން ދައުލަތަށް ސާބިތުކޮށް ނުދެވޭ ކަމަށް ޔާމީންގެ ފަރާތްޕުޅުން ކޯޓުގައި ދިޔައީ ވިދާޅުވަމުންނެވެ.
ރައީސް ޔާމީންގެ އެކައުންޓަށް ޖަމާވި ފައިސާ އަކީ ކުށްކޮށްގެން ހޯދި ފައިސާ ކަމަށް ޝައްކު ކުރެވޭ ހާލަތެއް އޮތްކަމަށް ދަށު ކޯޓާއި ހައި ކޯޓުން ހުކުމްކުރި ނަމަވެސް ސުޕްރީމް ކޯޓުގެ ހުކުމުގައި ބުނެފައި ވަނީ އެ ފައިސާއަކީ ކުށުގެ ފައިސާކަން ތަހުގީގަށް އެނގިފައި ނުވާ ކަމަށެވެ. ހުކުމުގައި ވަނީ ރައީސް ޔާމީނަށް ޖަމާވި އެއްމިލިއަން ޑޮލަރުގެ ހަގީގަތް ހޯދަން ތަހުގީގުކޮށް އެ ފައިސާއަކީ ކުށް ކޮށްގެން ހޯދައިފައިވާ ފައިސާ ނަމަ ދައުލަތަށް ނެގުމުގެ އިހްތިޔާރު އޮތް ކަމަށެވެ.
ސުޕްރީމް ކޯޓުގައި މި މައްސަލަ ބެއްލެވީ ފަނޑިޔާރު މަހާޒު އަލީ ޒާހިރާއި ފަނޑިޔާރު ޑރ. އަޒްމިރަލްދާ ޒާހިރާއި ފަނޑިޔާރު ޑރ. މުހައްމަދު އިބްރާހިމެވެ. ރިޔާސަތު ބެލެހެއްޓެވީ ފަނޑިޔާރު މަހާޒުއިއްވެވި ރައުޔަށް ފަނޑިޔާރުންގެ ބެންޗުގައި ހިމެނިވަޑައިގަންނަވާ އަނެއް ދެ ފަނޑިޔާރުން ވެސް ވަނީ ތާއީދު ކުރައްވައިފައެވެ.
ރައީސް ޔާމީންގެ ފަރާތުން އިސްތިއުނާފީ 22 މައްސަލައެއް ވަނީ ހުށަހަޅުއްވައފައެވެ. ލައިވްކޮށްގެން ކުރިޔަށް ދިޔަ މިއަދުގެ ޝަރީއަތުގެ މަޖިލީހުގައި ފަނޑިޔާރު މަހާޒް އަލީ ވަނީ ދިފާއުން އިސްތިއުނާފަށް ހުށަހަޅަން ފާހަގަކުރި މައްސަލަތަކަށް ދައުލަތުން ދީފައިވާ ރައްދުތަކާއި، ފަނޑިޔާރުންގެ ނިންމުން ތަފްސީލްކޮށް ވިދާޅުވެދެއްވައިފައެވެ.
