ރައީސް ޔާމީން ފުރުން މަނާ ކުރުމުގެ އަމުރެއް ނެރެފި
ފުލުހުން ތަހުގީގު ކުރަމުންދާ މައްސަލައަކާ ގުޅިގެން ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ރާއްޖެއިން ބޭރަށް ފުރުން މަނާ ކުރުމުގެ އަމުރު ނެރެފިއެވެ.
ރާއްޖެއިން ބޭރަށް ރައީސް ޔާމީން ފުރުން މަނާ ކުރުމުގެ ހުއްދައަކަށް ކްރިމިނަލް ކޯޓުގައި ފުލުހުން މިއަދު އެދުނީ ގއ. ވޮޑަމުލާ މައްސަލައިގައި އެމަނިކުފާނުގެ މައްޗަށް އިއްވައިފައިވާ ފަސް އަހަރުގެ ޖަލު ހުކުމް ސުޕްރީމް ކޯޓުން މިއަދު ބާތިލްކުރުމާ ގުޅިގެންނެވެ.
ފުލުހުންގެ މީޑިއާ އޮފިޝަލަކު ވިދާޅުވީ، ޝަރީއަތުގައި ހުރި މައްސަލަތަކަކާ ގުޅިގެން، ފުލުހުން އެދިގެން ރައީސް ޔާމީން ފުރުން މަނާ ކުރުމުގެ 7 ދުވަހުގެ އަމުރެއް ކްރިމިނަލް ކޯޓުން މިއަދު ނެރެދީފައިވާ ކަމަށެވެ.
ރައީސް ޔާމީންގެ މައްޗަށް އުފުލި މަނީ ލޯންޑަރިންގެ ފުރަތަމަ ދައުވާއިން އެމަނިކުފާނު މިއަދު ސަލާމަތްވެ ވަޑައިގެންނެވި ނަމަވެސް އެމަނިކުފާނުގެ މައްޗަށް އުފުލައިފައިވާ މަނީ ލޯންޑަރިންގެ އިތުރު ދެ ދައުވާއެއް އަދިވެސް އެބައޮތެވެ. އެއީ ރ. ފުއްގިރިއާއި ވ. އާރަށު މައްސަލައިގައި އުފުލައިފައިވާ ދެ ދައުވާއެވެ.
