މޯލްޑިވްސް މެރިން އެކްސްޕޯ އަށް ރައީސް ޒިޔާރަތްކުރައްވައިފި
"މޯލްޑިވްސް މެރިން އެކްސްޕޯ 2021"އަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ޒިޔާރަތްކުރައްވައިފިއެވެ.
މި އެކްސްޕޯއަކީ ނެޝަނަލް ބޯޓިންގ އެސޯސިއޭޝަން އޮފް މޯލްޑިވްސް (އެން.ބީ.އޭ.އެމް)އިން އިންތިޒާމްކޮށްގެން ކުރިއަށްގެންދާ އެކްސްޕޯއެކެވެ.
ރައީސް މޯލްޑިވްސް މެރިން އެކްސްޕޯ 2021އަށް ޒިޔާރަތްކުރެއްވުމުން އެ މަނިކުފާނަށް މަރުޙަބާ ދަންނަވައިފައި ވަނީ ނެޝަނަލް ބޯޓިންގ އެސޯސިއޭޝަން އޮފް މޯލްޑިވްސް (އެން.ބީ.އޭ.އެމް)ގެ ރައީސް އަޙްމަދު އަފްރާޙްއެވެ. މި ޒިޔާރަތްކުރެއްވުމުގައި އެމަނިކުފާނު ވަނީ އެކްސްޕޯގެ ސްޓޯލްތައް ބައްލަވާލައްވައިފައެވެ. އަދި އެކްސްޕޯގައި ދައްކައިލާފައިވާ ބައެއް ތަކެތީގެ މަޢުލޫމާތު ވެސް އެމަނިކުފާނު ވަނީ ސާފުކުރައްވައިފައެވެ. މީގެ އިތުރުން އެމަނިކުފާނު ވަނީ އެވެއަނެސް ކެމްޕެއިންކަމަށްވާ "ލައިފް ޖެކެޓް ވެއަރ އިޓް" މި އެކްސްޕޯގައި އިފްޠިތާޙްކޮށްދެއްވައިފައެވެ.
ހުޅުމާލެ ސެންޓަރަލް ޕާކުގައި މި ހިނގާ ޑިސެންބަރު 13އިން 15އަށް ކުރިއަށްދާ މި އެކްސްޕޯއަކީ މެރިން ދާއިރާގެ ވިޔަފާރީގައި ހަރަކާތްތެރިވާ ފަރާތްތަކަށް ޚާއްޞަކޮށްގެން ބާއްވަމުން ގެންދާ އެކްސްޕޯއެކެވެ.
މި އެކްސްޕޯގައި ރާއްޖޭގެ މެރިން އިންޑަސްޓްރީގެ ގިނަ ބާވަތްތަކެއް ދައްކައިލައިފައިވެއެވެ. އަދި މި އެކްސްޕޯގައި މެރިން ދާއިރާއާއި ގުޅުންހުރި މުދަލާއި ފޯރުކޮށްދޭ ޚިދުމަތްތަކުގެ މަޢުލޫމާތު ވެސް މި ދާއިރާގެ ގިނަ ބައިވެރިންނާ ޙިއްޞާކޮށްފައިވެއެވެ.
މި އެކްސްޕޯގައި ބައިވެރިވި ބައެއް ކުންފުނިތަކުން ވަނީ އަލަށް ބާޒާރަށް ނެރުމަށް ހަމަޖެހިފައިވާ ބައެއް ތަކެތި ދައްކައިލައި އެ ތަކެއްޗާއި ބެހޭ ގޮތުން ބައިވެރިންނާއި މަޢުލޫމާތު ޙިއްޞާކުރައްވައިފައެވެ.
