މެންބަރު ހުސައިން ވަހީދަކީ އެމްޑީޕީގެ ވަރުގަދަ ތަނބެއް: ރައީސް ނަޝީދު
ރައްޔިތުންގެ މަޖިލީހުގެ ކޮމަންޑޫ ދާއިރާގެ މެންބަރު ޙުސައިން ވަޙީދަކީ ސަރުކާރު ހިންގާ މައި ޕާޓީ އެމްޑީޕީގެ މައި ތަނބެއް ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ކޮމަންޑޫ ދާއިރާގެ އެމްޑީޕީގެ މެންބަރު ހުސައިން ވަހީދު ރޭގެ ވަގުތެއްގައި އަވަހާރަވުމާ ގުޅިގެން ރައީސް ނަޝީދު ވިދާޅުވީ ޙުސައިން ވަޙީދަކީ ރާއްޖެއަށް ޑިމޮކްރަސީ ގެނެސް ގިނަ ސިޔާސީ ޕާޓީ އެކުލެވޭ ނިޒާމު ތައާރަފުކުރުމުގައި ބޮޑު ދައުރެއް އަދާކުރެއްވި ބޭފުޅެއް ކަމަށެވެ.
އަދި ޑިމޮކްރަސީއަށް ވެރިކަން އަނބުރައިލާން ކުރެވުނު ދަތުރުގައި ޙުސައިން ވަޙީދަކީ އިޚުލާޞްތެރި ބައިވެރިއެއް ކަމަށް ރައީސް ނަޝީދު ވިދާޅުވިއެވެެ. ރައީސް ނަޝީދު ވަނީ އޭނާގެ އާއިލާއަށް ތައުޒިޔާ ވިދާޅުވެފައެވެ.
"ދެން"އަށް މައުލޫމާތު ލިބިފައިވާ ގޮތުގައި އޭނާ އަވަހާރަވީ ރޭގެ ވަގުތެއްގައި އޭޑީކޭގައި ފަރުވާ ދެނިކޮށެވެ. މެންބަރު ހުސެއިންގެ ހާލު ކޮޅު ގޯސްވެގެން އޭޑީކޭގައި ފަރުވާ ދެމުން އަންނަތާ ދެ ހަފްތާވެއްޖެ ކަމަށް މައުލޫމާތު ލިބެއެވެ.
