"އިންޑިއާ އައުޓް" ކެމްޕޭނާ އެކު ރައީސް ޔާމީން ނިލަންދޫއަށް ވަޑައިގަންނަވަނީ
ރާއްޖެއިން އިންޑިއާ ސިފައިން ބޭލުމަށް ގޮވައިލައި، އިދިކޮޅު ފަރާތްތަކުން ހިންގާ "އިންޑިއާ އައުޓް" ކެމްޕޭނާ އެކު، އިދިކޮޅު ލީޑަރު އަދި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ފ. ނިލަންދޫއަށް ވަޑައިގަންނަވަން ނިންމަވައިފިއެވެ.
ރައީސް ޔާމީންގެ މި ދަތުރުފުޅާ ގުޅޭ ގޮތުން އިތުރަށް މައުލޫމާތު ދެއްވަމުން އިދިކޮޅު ޕްރޮގްރެސިވް ކޯލިޝަންގެ ތަރުޖަމާނު ހީނާ ވަލީދު ވިދާޅުވީ ނިލަންދޫއަށް ރައީސް ޔާމީން ވަޑައިގަންނަވާނީ އަންނަ ބުރާސްފަތި ދުވަހު ކަމަށާއި އެ ދުވަހު ނިލަންދޫގައި ބާއްވާ ހަރަކާތްތަކާއި ރޭގަނޑު އެރަށުގައި ބާއްވާ ޖަލްސާގައި އެމަނިކުފާނު ބައިވެރިވެވަޑައިގަންނަވާނެ ކަަމަށެވެ.
"އިންޑިއާ އައުޓް" ކެމްޕޭނާ އެކު ރައީސް ޔާމީން އެންމެ ފުރަތަމަ ވަޑައިގަންނަވަން ނިލަންދޫއަށެވެ. ނަމަވެސް މޫސުން ތަންނުދިނުމުގެ ސަބަބުން އެމަނިކުފާނުގެ ދަތުރުފުޅު ފެއްޓެވީ ކ. ގުރައިދޫންނެވެ.
ހީނާ މީގެ ކުރިން ވިދާޅުވީ ރައީސް ޔާމީންގެ ނަޒަރުގައި މިހާރު ކުރަން އޮތް އެންމެ މުހިންމު މަސައްކަތަކީ ރާއްޖޭގެ މިނިވަންކަމުގެ ދިފާއުގައި ކުރަން ޖެހޭ މަސައްކަތް ކަމަށެވެ. އެހެންކަމުން ރަށްރަށަށް ވަޑައިގެން އެ ކެމްޕޭން ޕެޓިޝަނަށް ރައީސް ޔާމީން ގެންދަވަނީ ސޮއި ހޯދުމަށް މަސައްކަތް ކުރައްވަމުންނެވެ.
