ބަލިމަޑު ކަމަކަށްވުރެ ބާރަށް "އިންޑިއާ އައުޓް" އެބަ ފެތުރޭ: ރައީސް ޔާމީން
ރާއްޖޭގައި އިންޑިއާގެ އަސްކަރިއްޔާ ތިބުމާ ދެކޮޅަށް، އިދިކޮޅު ފަރާތްތަކުން ހިންގަމުން އަންނަ "އިންޑިއާ އައުޓް" ކެންޕެއިން ބަލިމަޑު ކަމަކަށް ވުރެ ބާރަށް ރާއްޖޭގައި ފެތުރެމުން އަންނަ ކަމަށް އިދިކޮޅު ލީޑަރު، ކުރީގެ ރައީސް ، ރައީސް އަބްދުﷲ ޔާމީން އަބްދުލްޤައްޔޫމް ވިދާޅުވެއްޖެއެވެ.
ޖަލުން މިނިވަންވެ ވަޑައިގަތުމުން، ރައީސް ޔާމީން ވަނީ "އިންޑިއާ އައުޓް" ކެންޕެއިންގައި ބައިވެރިވެ ވަޑައިގެންފައެވެ. އަދި އެ ކެންޕެއިނަކީ އެމަނިކުފާނުގެ އިރުޝާދުގެ ދަށުން ކުރިޔަށްދާ ކެންޕެއިނެއް ކަމަށް ވިދާޅުވަމުން، ރައީސް ޔާމީން ވަނީ، ކެންޕެއިން އިތުރަށް ފުޅާ ކުރުމަށް އަތޮޅު ތެރެއަށް ދަތުރުފުޅުތަކެއް ފައްޓަވައިފައެވެ. މިގޮތުން ރައީސް ޔާމީން މިއަދު ވަނީ ފ. ނިލަންދުއަށް ވަޑައިގެން އެރަށުގައި ތިބި "އިންޑިއާ އައުޓް"އަށް ތާއީދު ކުރާ ފަރާތްތަކާ ބައްދަލުކޮށް ވާހަކަފުޅު ދައްކަވައިފައެވެ.
ރައީސް ޔާމީން ވިދާޅުވީ، ވެރިކަމުގައި މިއަދު ތިބި ފަރާތްތަކަށް ރާއްޖޭގެ ރައްޔިތުންގެ ކަންބޮޑުވުންތަކުގެ އަޑު ނީވޭ ކަމަށެވެ. އަދި ދިވެހި ރައްޔިތުންގެ މަސްލަހަތުގެ ވާހަކަ ދައްކާއިރު، ރައްޔިތުންނާ އެކު ސަރުކާރަށް ނޯވެވެނީ ކީއްވެތޯ، ރައީސް ޔާމީން ވަނީ ސުވާލު އުފައްދަވައިފައެވެ.
"ވެރިކަމުގައި ތިބި ފަރާތްތަކުން، ރާއްޖޭގެ ރައްޔިތުންނަށް ކަންބޮޑުވާ ކަންބޮޑުވުމަށް ވުރެ ބޮޑަށް އެމީހުންނަށް އުދަނގޫ ވެގެން އެމީހުންނަށް ބޮޑުވެގެން އުޅެނީ އިންޑިއާއަށް އަޅުގަނޑުމެން މި ގޮވާ، ގޮވުމުން އިންޑިއާއަށް ދަތިވެދާނެތީ" ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ، ރާއްޖޭގައި އިންޑިއާ ސިފައިން ތިބޭނެކަން ހުރިހާ ލީޑަރުން ވެސް ޤަބޫލު ކުރާ ކަމަށާއި އެއީ ރައްޔިތުންނަށް ވެސް އެނގޭ ހަޤީޤަތެއް ކަމަށެވެ. އަދި މިކަމުގެ ނުރައްކާތެރިކަން އެނގިތިބެ، މިކަމާ ދެކޮޅަށް ކަމާ ބެހޭ އިދާރާތަކުން ނުނިކުތުމުގެ ނަތީޖާއެއްގެ ގޮތުން، ރައްޔިތުން މިއަދު މިކަމާ ދެކޮޅަށް ނިކުމެ ތިބި ކަމަށް ރައީސް ޔާމީން ވިދާޅުވިއެވެ.
"އެކަމާ ކަންބޮޑުވެގެން، އެކަމުގެ ނުރައްކާތެރިކަން އިޙްސާސް ކުރެވޭތީ، ރާއްޖޭގެ ހުރިހާ ދިމާލެއްގައި ފެތުރެމުން މިދަނީ، ތަދުމަޑު ކަމަކަށް ވުރެ، ބަލިމަޑު ކަމަކަށްވުރެން ބާރަށް ފެތުރިގެން މިދަނީ، އިންޑިއާ އަސްކަރިއްޔާ މިތާ ތިބީމަ، އެކަމާ ދެކޮޅަށް އަޅުގަނޑުމެންގެ އަޑު އުފުލާ، އަޅުގަނޑުމެންގެ ޝުއޫރުތައް" ރައީސް ޔާމީން ވިދާޅުވީ، މިއީ ރައްޔިތުންގެ ވިސްނުން ހުރި ގޮތް، ކަމަށާއި ރައްޔިތުންގެ ބަހުގެ އަޑު ސަރުކާރަށް ނުއިވުމުުން، ރާއްޖޭގެ ހުރިހާ ދިމާއަކުން އަޑު އުފުލާ މަންޒަރު މިއަދު ފެންނަމުން އަންނަ ކަމަށަށެވެ.
Ads by STO
