ގޭގެ މަސައްކަތު މީހެއް ކޮވިޑަށް ފައްސިވެ އަމީތާބު އަނެއްކާ ވެސް ނުރައްކަލުގައި!
ބޮލީވުޑްގެ ތަރި އަމީތާބް ބައްޗަންގެ ގޭގައި މަސައްކަތްކުރާ މީހަކު ކޮވިޑް19އަށް ފައްސިވުމުގެ ސަބަބުން އަނެއްކާ ވެސް އޭނާއަށް ކޮވިޑުގެ ބިރުވެރިކަން ބޮޑުވެއްޖެއެވެ.
އަމީތާބުގެ އާއިލާ މިދިޔަ އަހަރު ކޮވިޑުގެ ބަލިމަޑުކަން ތަހައްމަލުކޮށްފައިވާއިރު އޭނާގެ އިތުރުން ދަރިފުޅު އަބީޝޭކް ބައްޗަންއާއި އަބީޝޭކްގެ އަންހެނުން އައިޝްވާރިޔާ އަދި އެމީހުންގެ 10 އަހަރުގެ ދަރިފުޅަށް ވެސް މި ބަލި ޖެހުނެވެ. ޖުލައި 2020ގައި ކޮވިޑު ބައްޔަށް ފަރުވާ ހޯދަން އަމީތާބު ހޮސްޕިޓަލުގައި ވެސް އެޑްމިޓުކުރެވުނެވެ. އަމީތާބް ވަނީ އޭރު އޭނާގެ ތަޖުރިބާ، ބްލޮގު ޕޯސްޓެއްގައި ހިއްސާކޮށްފައެވެ.
ގޭގައި މަސައްކަތް ކުރާ މީހަކު ކޮވިޑަށް ފައްސިވިކަން ހާމަކޮށް އަމީތާބުގެ ބްލޮގުގައި އޭނާ ބުނެފައި ވަނީ މިކަމާ ގުޅޭ އިތުރު ޚަބަރުތައް ފަހުން ހިއްސާ ކުރާނެ ކަމަށެވެ.
އަމީތާބުގެ ގޭގައި މަސައްކަތް ކުރާ މީހަކު ކޮވިޑަށް ފައްސިވެ ސިއްހީ ފަރުވާދޭ ތަނެއްގައި ކަރަންޓީނު ކޮށްފައިވާކަމަށް ބީއެމްސީއިން ވަނީ ބުނެފައެވެ. މަސައްކަތު މީހަކު ފައްސިވި ނަމަވެސް އަމީތާބްގެ އާއިލާ މެންބަރަކަށް އަލުން ބަލި ޖެހުނު ކަމެއް މިރިޕޯޓުގައި ނުވެއެވެ.
އިންޑިއާގައި އަނެއްކާ ވެސް ހަލުވިކަމާ އެކު ކޮވިޑު ފެތުރޭން ފެށުމުން ރައްކާތެރިކަމުގެ ފިޔަވަޅުތައް ވަނީ އިތުރަށް ވަރުގަދަކޮށްފައެވެ.
