ޝާހްރުކް ޚާންގެ ގެއެއް ގޮއްވައިލާނެކަމަށް ބުނެ ބިރުދެއްކި މީހަކު ހައްޔަރުކޮށްފި
ބޮލީވުޑްގެ މެގަސްޓާ ޝާހްރުކް ޚާންގެ މުމްބާއީ ގެއެއް ކަމަށްވާ މަންނަތުއަށް ބޮމުގެ ހަމަލާއެއް ދޭނެކަމުގެ އިންޒާރު ދިން ކަމަށް ބުނާ މީހަކު ހައްޔަރުކޮށްފިއެވެ.
ޖީތޭޝް ތާކުރު ނަމަކަށް ކިޔާ އެމީހާގެ މައްޗަށް ތުހުމަތު ކޮށްފައި ވަނީ ޖެނުއަރީ މަހުގެ 6ވަނަ ދުވަހު މަހާރާޝްތުރާ ފުލުހުންގެ ކޮންޓްރޯލް ސެންޓަރަށް ގުޅައި، ބަންދްރާގެ މަންނާތު ހިމެނޭ ގޮތަށް މުމްބާއީގެ ގިނަ ސްޕޮޓްތަކެއް ގޮއްވައިލާނެކަމުގެ އިންޒާރު ދިން ކަމުގެ ތުހުމަތެވެ.
ރިޕޯޓްތައް ބުނާ ގޮތުގައި ނަމްބަރު ނޭނގޭގޮތަށް ކޯލެއްކޮށް މުމްބާއީގެ ގިނަ ލޮކޭޝަންތަކެއް ގޮއްވައިލާނެ ކަމުގެ އިންޒާރު ދީފައިވާ ކަމަށާއި، އޭގެ ތެރޭގައި ޗަތްރަޕަތީ ޝިވާޖީމަހާރާޖް ޓާމިނަލް (ސީއެސްއެމްޓީ)، ކުރަލާ ރެއިލްވޭ ސްޓޭޝަން އަދި އަވަށްޓެރި ނާވީ މުމްބާއީގެ ގުރުދުވާރާ ހިމެނޭކަމަށް ވެއެވެ. އޭނާގެ އަތުގައި ނިއުކްލިއާ ހަތިޔާރު ހުރި ކަމަށް ބުނެފައިވާކަމަށް ވެސް މުމްބާއީގެ ފުލުހުންނާ ހަވާލާދީ ބުނެފައިވެއެވެ. އޭނާގެ މައްޗަށް ދައުވާ އުފުލައިފައި ވަނީ އިންޑިއާގެ ޕީނަލްކޯޑް (އައިޕީސީ)ގެ 182، 505 އަދި 506 ވަނަ މާއްދާގެ ދަށުންނެވެ.
"މަހަރަޝްތުރާގެ ފުލުހުންގެ ކޯލެއް އަޅުގަނޑުމެންނަށް ލިބުނީ ޓެރަރިސްޓް ހަމަލާތަކެއް ދޭން ކަމަށް ބުނެ . އެ މީހާ ހައްޔަރު ކުރުމުގައި އެމީހުން އަހަރެމެންގެ އެހީތެރިކަމަށް އެދުނު. އަޅުގަނޑުމެން އޭނާ ހޯދައި، އިންޑިއާގެ ޕީނަލް ކޯޑުގެ ކަމާ ބެހޭ ބައިތަކުގެ ދަށުން އޭނާ ހައްޔަރުކޮށްފިން." ސީއެސްޕީ އަލޯކް ޝަރްމާއާ ހަވާލާދީ ލީހްރީންއިން ނެރުނު ބަޔާނެއްގައި ބުނެފައިވެއެވެ.
މީގެ އިތުރުން ޝަރްމާ ބުނެފައި ވަނީ މިކަހަލަ އަމަލެއް ހިންގުމުގެ ހިތްވަރެއް އޭނާގެ ކިބައިގައި ނެތް ކަމަށާއި މިފަދަ ކޯލު އޭނާ ކުރަނީ މަސްތުގެ ހާލަތުގައި ކަމަށެވެ.
