ވެކްސިން ޖަހަން ގޮސް ތިބި މީހުންނަށް ހިޔާވާނެ ގޮތް އުރީދޫން ހަދައިދީފި

ކޮވިޑް-19 ވެކްސިން ބޫސްޓަރު ޑޯޒް ޖަހަން ގޮސް ތިބި މީހުންނަށް ހިޔާވާނެ ގޮތަށް ވެކްސިން ޖަހާ ސެނެހިޔާ ސެންޓަރު ކައިރީ އުރީދޫ މޯލްޑިވްސްއިން ޓެންޓް ޖަހައިފިއެވެ.

Ads by STELCO

18 އަހަރުން މަތީގެ މީހުންނަށް މިއަދު ވެކްސިން ބޫސްޓަރު ޑޯޒްތައް ޖަހަން ފެށިއިރު، ވެކްސިން ޖެހުމަށް ގިނަ ބަޔަކު ވަނީ ކިއުގައި ޖެހިފައެވެ. މާލޭ ސަރަހައްދުގައި ވެކްސިން ޖެހުން ކުރިޔަށް ގެންދަނީ އޮންލައިންކޮށް އެޕޮއިންޓްމެންޓް ދީގެންނެވެ. އެހެން ނަމަވެސް ވެކްސިން ޖަހަން ފެށުމާ އެކު ފެނުނީ ކިއު ދަމައިލި ތަނެވެ.

ބޫސްޓަރު ވެކްސިން ޖެހުމުގެ އިންތިޒާމުތައް ވަރަށް ގޯސް ކަމަށް ބުނެ ގިނަ ބަޔަކު ގެންދަނީ ސޯސަލް މީޑިއާގައި ޚިޔާލު ފާޅު ކުރަމުންނެވެ. އަދި އަވީގައި ކިއުގައި ހުންނަން ޖެހޭ މައްސަލަ ވަނީ ބޮޑުވެފައެވެ.

އުރީދޫއިން ޓެންޓް ޖެހުމުން އުރީދޫއަށް ގިނަ ބަޔަކު އަންނަނީ ތައުރީފް ކުރަމުންނެވެ.

އޮންލައިން ނޫހަކަށް ހެލްތު މިނިސްޓްރީން ވިދާޅުވީ، ބޫސްޓާ ޑޯޒް ޖަހަން މިއަދު ފުރަތަމަ ފެށި އިރު ލަސްވާން މެދުވެރިވީ ސިސްޓަމަށް ދިމާވި މައްސަލައެއްގެ ސަބަބުން ކަމަށެވެ.

ރާއްޖޭގެ މުޅި އާބާދީއަށް ކޮވިޑް-19 ވެކްސިން ބޫސްޓަރު ޖެހޭނެ ވަރަށް ވެކްސިން ލިބިފައިވާ ކަމަށް މީގެ ކުރިން ހެލްތް މިނިސްޓްރީން ވަނީ ވިދާޅުވެފައެވެ.

ރާއްޖޭގައި ކޮވިޑް-19 ނުރައްކާ ވަރަށް ބޮޑުވެފައިވާއިރު، މިހައިތަނަށް ރާއްޖެއިން މި ބަލި 101،418 މީހަކަށް ޖެހިފައިވެއެވެ.

ރާއްޖެއިން މިހައިތަނަށް 29،082 މީހަކު ވެކްސިން ތިން ޑޯޒް ހަމަކޮށްފައިވާކަން ފާހަގަ ކޮށްލެެވެވެ.