ލަތާ މަންގޭޝްކަރުގެ ހާލުގޯސްވެ އެއްވެސް މީހަކަށް އޭނާއާ ބައްދަލެއް ނުކުރެވޭ
މުމްބާއީގެ ބްރީޗް ކޭންޑީ ހޮސްޕިޓަލުގައި އެޑްމިޓްކުރި ލެޖެންޑަރީ ޕްލޭބެކް ލަވަކިޔުންތެރިޔާ ލަތާ މަންގޭޝްކަރުގެ ސިއްހީ ހާލަތު އިތުރަށް ގޯސްވެއްޖެއެވެ.
ލަތާ އެޑްމިޓު ކޮށްފައި ވަނީ ކޮވިޑް-19އަށް ފައްސިވެ ހާލު ދެރަވުމުންނެވެ.
އިންޑިއާގެ ރަޓްނާ އެވޯޑު ލިބިފައިވާ ލަތާއަށް ވަނީ ކޮވިޑުގެ އިތުރުން ނިއުމޯނިއާ ވެސް ޖެހިފައެވެ. އަދި އޭގެ ސަބަބުން އޭނާއަށް މިހާރު ދަނީ ހޮސްޕިޓަލުގެ އައިސީޔޫގައި ފަރުވާދެމުންނެވެ.
މިދަނޑިވަޅުގައި އެއްވެސް މީހަކަށް މި ލަވަކިޔުންތެރިޔާއާ ބައްދަލުކުރުމުގެ ފުރުސަތު ދީފައެއް ނުވެއެވެ. އޭނާގެ ހަށިގަނޑުން ބަލިން ރަނގަޅުވެފައިވާ ކަމުގެ ނިޝާންތައް ފެންނަން އިތުރު ވަގުތު ނަގާނެ ކަމަށް ޑޮކްޓަރުން ވަނީ ބުނެފައެވެ. ނަމަވެސް އައިސީޔޫގައި އޮންނަން ޖެހެނީ ކިހައި މުއްދަތަކަށް ކަމަށް ބުނުމަށް ޑޮކްޓަރުން ވަނީ ދެކޮޅު ހަދައިފައެވެ.
ތަޖުރިބާކާރު ލަވަކިޔުންތެރިޔާ ލަތާ ކޮވިޑް-19އަށް ފައްސި ވެފައި ވަނީ އޭނާގެ ގޭގައި މަސަތްކަތް ކުރަން އުޅުނު މީހަކު މި ބައްޔަށް ފައްސިވުމުންނެވެ.
އޭނާއަކީ އިންޑިއާގައި އެންމެ މަޝްހޫރު އަދި އެންމެ ގިނަ ބައެއްގެ އިހުތިރާމް ހޯދާފައިވާ ޕްލޭބެކް ލަވަކިޔުންތެރިންގެ ތެރޭގައި ހިމެނޭ ލަވަކިޔުންތެރިއެކެވެ. އޭނާ ވަނީ ހާހަކަށް ވުރެ ގިނަ ހިންދީ ފިލްމުތަކުގައި ލަވަތައް ރެކޯޑްކޮށް، އިންޑިއާގެ 36އަށް ވުރެ ގިނަ ބަހުރުވައާއި ބޭރުގެ ބަސްބަހުން ލަވަތައް ކިޔައިފައެވެ. ނަމަވެސް މައިގަނޑު ގޮތެއްގައި އޭނާ ލަވަ ކިޔައިފައި ވަނީ ހިންދީ އަދި މަރާޓީ ބަހުންނެވެ.
