ރައްޔިތުން ނިކުމެ މުޒާހަރާ ކުރުމުން ކުޑަރިކިލަށް ޑޮކްޓަރަކު ހަމަޖައްސައިފި
- ޑޮކްޓަރަކު ހަަމަޖެއްސި ނަމަވެސް ޑޮކްޓަރު ފޮނުވާނެ ދުވަހެއް ނޭނގޭ ކަމަށް ރަށު ކައުންސިލުން ބުނޭ.
ބ. ކުޑަރިކަލުގައި ޑޮކްޓަރަކު ނެތިގެން މުޒާހަރާކޮށް އެ ރަށުގެ ސިއްހީ މަރުކަޒު ބަންދު ކުރި ފަހުން އެ ރަށަށް ޑޮކްޓަރަކު ފޮނުވަން ނިންމައިފިއެވެ.
”ދެން”އަށް މަޢުލޫމާތު ދެއްވަމުން ކުޑަރިކިލު ކައުންސިލްގެ ރައީސް، އަބްދުލް ހަންނާން އައްބާސް ވިދާޅުވީ އެ ރަށަށް ޑޮކްޓަރަކު ހަމަޖައްސައިފައިވާ ކަމަށް ހެލެތް މިނިސްޓްރީން އަންގައިފައިވާ ކަމަށެވެ.
ހަންނާން ވިދާޅުވީ ޑޮކްޓަރަކު ހަމަޖައްސާފައިވާ ކަމަށް ހެލްތް މިނިސްޓްރީން އަންގައިފައިވީ ނަމަވެސް ރަށަށް ޑޮކްޓަރު ގެނައުމަށް ހަމަޖެހިފައި ވަނީ ކޮންދުވަހަކު ކަމެއް އަދި ސާފު ނުވާ ކަމަށެވެ. އަދި ސިއްހީ މަރުކަޒު މިހާރު އަލުން ހުޅުވައިފައިވާ ކަމަށާއި ބޭރަށް ހިންގުމާއި ހޮޑުލުމުގެ ރޯގާ ވަރަށް ބޮޑަށް ރަށު ތެރޭގައި އަދިވެސް ފެތުރެމުންދާ ކަމަށެވެ.
“ހެލްތް މިނިސްޓްރީން އަންގައިފައި ވަނީ ޑޮކްޓަރަކު ހަމަޖައްސައިފި ކަމަަށް. ނަމަވެސް ޑޮކްޓަރު މި ރަށަށް އަންނަނީ ކޮން ދުވަހަކު ކަމެއް އެނގިފައެއް ނުވޭ. މިހާރު މަރުކަޒު ހުޅުވައިފި. ވަރަށް ބޮޑަށް އަދިވެސް ރަށު ތެރޭގައި ރޯގާ ފެތުރެމުން ދަނީ” ހަންނާން ވިދާޅުވިއެވެ.
ބޭރަށް ހިންގުމާއި ހޮޑުލުމުގެ ރޯގާއެއް ކުޑަރިކިލުގައި ހަލުއިކަމާ އެކު ފެތުރެމުން ދާއިރު ގާތްގަޑަކަށް 20 މީހުން މި ބައްޔަށް ދަނީ ފަރުވާ ހޯދަމުންނެވެ. މި ބަލީގައި ބައެއް ކުޑަކުދިންގެ ހާލު ދެރަވެފައިވާ ކަމަށް ވެސް ހަންނާން ވަނީ ވިދާޅުވެފައެވެ. މި ރޯގާގެ އިތުރުން ކޮވިޑް-19އަށް ވެސް އެ ރަށުން މީހަކު ވަނީ ފައްސިވެފައެވެ.
