ރާއްޖޭގައި އޮމިކްރޮން ވޭރިއަންޓްގެ 74 ވޭދަނަ ވަނީ ފެނިފައި: އެޗްޕީއޭ

ރާއްޖެއިން މިހައިތަނަށް އޮމިކްރޮން ވޭރިއަންޓްގެ 74 ވޭދަނަ ފެނިފައިވާ ކަމަށް އެޗްޕީއޭއިން ހާމަކޮށްފިއެވެ.

Ads by STELCO

މިހާރު ކުރިޔަށްދާ ނޫސްވެރިންގެ ބައްދަލުވުމުގައި އެޗްޕީއޭގެ އެޕިޑެމޮލޮޖިސްޓް ޑރ. އިބްރާހީމް އަފްޒަލް ވިދާޅުވީ، މިހައިތަނަށް އޮމިކްރޮންއަށް ޓެސްޓް ކުރުމަށް 1196 ސުންކު ފޮނުވައިފައިވާ ކަމަށާއި އޭގެ ތެރެއިން 74 ވޭދަނައެއް މިހައިތަނަށް ފައްސިވެފައިވާ ކަމަށެވެ. އަދި އެންމެ ފަހުން ޓެސްޓް ކުރަން ފޮނުވި ބެޗުން 100 ސުންކުގެ ތެރެއިން 51 މީހަކަށް އޮމިކްރޮން ޖެހިފައިވާ ކަމަށް ޑރ. އަފްޒަލް ވިދާޅުވިއެވެ.

ޑރ. އަފްޒަލް ވިދާޅުވީ އޮމިކްރޮން ވޭދަނަތައް ފެނިފައިވާ ރަށްތަކުގެ ތެރޭގައި މާލެ، ކ. މާފުށި، ދ. ކުޑަހުވަދޫ، އައްޑޫ ސިޓީ، ލ. ގަން، ލ. މުންޑޫ، ލ. އިސްދޫ، ހދ. ވައިކަރަދޫ، ހދ. ނޮޅިވަރަން، ފ. މަގޫދޫ، އަދި ކ. ތުލުސްދޫ ހިމެނޭ ކަމަށެވެ.

“އޮމިކްރޯން ކޭސެސްތަކަށް ބަލާއިރު އަޅުގަނޑުމެން ފޮނުވި 1196 ސާމްޕަލްތަކުގެ ތެރެއިން 74 ކޭސް ފެނިފައި ވަނީ އޮމިކްރޯން ކޭސެސްގެ ގޮތުގައި. އެންމެ ފަހުން ޓެސްޓް ކުރަން ފޮނުވި ބެޗުން 100 ސާންޕަލްގެ ތެރެއިން 51 މީހަކަށް ވަނީ އޮމިކްރޮން ޖެހިފައި. މީގެން ވެސް އަޅުގަނޑުމެންނަށް މި ދޭހަ ވަނީ އޮމިކްރޯން ފެތުރިގެންދާ ހަލުވިކަމާއި އަދި ސްޓްރެއިންތައް އޯވާޓޭކް ކުރަމުންދާ ކަން” ޑރ. އަފްޒަލް ވިދާޅުވިއެވެ.

ރާއްޖޭގައި ކޮވިޑްގެ ހާލަތު މިހާރު އަނެއްކާ ވެސް އަންނަނީ ވަރަށް ބޮޑަށް ގޯސްވަމުންނެވެ. ފާއިތުވެ ދިޔަ 24 ގަޑިއިރުގެ ތެރޭގައި ރިކޯޑް އަދަދަކަށް މީހުން ވަނީ ބައްޔަށް ފައްސިވެފައެވެ. އެގޮތުން މާލެއިން ފައްސިވި 1،325 މީހުންނާއި އަތޮޅުތެރެއިން ފައްސިވި 681 މީހުންނާ އެކު ޖުމްލަ 2،349 މީހުން ވަނީ އަލަށް ފައްސިވެފައެވެ.