މިހާރުގެ ވިސްނުން ހުރީ ބައްޔާއެކު ދިރިއުޅެން: އެޗްޕީއޭ

މިހާރުގެ ވިސްނުން ހުރީ ކޮވިޑް ބައްޔާ އެކު ދިރިއުޅެން ކަމަށް ހެލްތު ޕްރޮޓެކް އެޖެންސީ (އެޗްޕީއޭ)އިން ވިދާޅުވެއްޖެއެވެ.

Ads by STELCO

މިހާރު ކުރިޔަށްދާ ނޫސްވެރިންގެ ބައްދަލުވުމުގައި އެޗްޕީއޭގެ އެޕިޑެމޮލޮޖިސްޓް ޑރ. އިބްރާހީމް އަފްޒަލް ވިދާޅުވީ، މި ބަލިމަޑުކަން ތިން، ހަތަރު އަހަރަށް ދެމިގެން ގޮސްފާނެ ކަމަށާއި އަބަދު އެމެޖެންސީ ހާލަތުގައި ނުތިބެވޭނެ ކަމަށެވެ.

"މިހާރު އަޅުގަނޑުމެންގެ ޚިޔާލުތައް މި ހުންނަނީ ބައްޔާ އެކުގައި ދިރިއުޅުން ކުރިޔަށް ގެންދާ ކަހަލަ އުސޫލަކަށް. ކޮންމެ ގޮތެއް ވިޔަސް ތިން އަހަރު ހަތަރު އަހަރު ބަލިމަޑުކަން ދެމިގެން ދިޔަސް އަޅުގަނޑުމެންނަކަށް ނުތިބެވޭނެތާ އެ ހުރިހާ ވަގުތެއްގައި އެމަޖެންސީ ހާލަތުގައެއް" ޑރ. އަފްޒަލް ވިދާޅުވިއެވެ.

ޑރ. އަފްޒަލް ވިދާޅުވީ، ޤައުމުގެ އިޤްތިޞާދު ވެސް އަނބުރާ ގެންނަން ޖެހޭ ކަމަށާއި އާއްމުދަނީ ހޯދާ މީހާ އޭނާގެ މަސައްކަތަށް ވެސް ނިކުންނަން ޖެހޭ ކަމަށެވެ. އަދި ދަރިވަރުން ކިޔަވަން ވެސް ޖެހޭ ކަމަށާއި މިފަދަ ސަބަބުތަކަށް ޓަކައި އެޗްޕީއޭގެ ވިސްނުން މިހާރު ހުރީ އާއްމު ދިރިއުޅުމުގެ ކަންތައް ހުއްޓުމަކަށް ނައިސް ރައްކާތެރި ގޮތުގައި ކަންކަން ކުރިޔަށް ގެންދެވޭތޯ ކަމަށް ޑރ. އަފްޒަލް ވިދާޅުވިއެވެ.

މާލޭގައި ކޮވިޑް-19ގެ ވޭދަނަތައް ވަރަށް ބޮޑަށް އިތުރުވެފައިވާތީ، މާލެ ފުރަބަންދު ކުރުމުގެ ވިސްނުން ހުރިތޯ ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ޑރ. އަފްޒަލް ވިދާޅުވީ، މިވަގުތު އެފަދަ ނިންމުމެއް ނިންމައިފައި ނެތް ކަމަށެވެ. އަދި ކޮންމެ ދުވަހަކު ވެސް ކަމުގެ މާހިރުންނާއި ބޭރުގެ ފަރާތްތަކާ އެކު ވެސް އަޅަން ޖެހޭ ފިޔަވަޅުތަކާ ގުޅޭ ގޮތުން މަޝްވަރާ ކުރާ ކަމަށާއި ލޮކްޑައުން ކުރަން ޖެހޭ ހާލަތެއް އައިސްފިނަމަ އެކަން ކުރާނެ ކަމަށެވެ.

"ކުރިޔަށް އޮތްތާންގައި އަޅާނެ ފިޔަވަޅެއް މިވަގުތު ނާޅާނެއެކޭ ބުނެވޭކަށް ނޯންނާނެ. އެ ހާލަތަށް އައީމަ އެކަންތައް ވެސް ކުރާނެ" ޑރ. އަފްޒަލް ވިދާޅުވިއެވެ.

ޑރ.އަފްޒަލް ވިދާޅުވީ، ބަލީގެ ހާލަތު މިހާރު ގޯސްވެފައިވާ މިންވަރުން އަރައިގަތުމަށް ކުރެވޭނެ އެންމެ މުހިންމު ކަމަކީ ކޮވިޑް-19 ވެކްސިންގެ ބޫސްޓަރ ޑޯޒް ޖެހުން ކަމަށެވެ. މިކަމުގައި އެންމެންގެ އެއްބާރުލުން ބޭނުންވާ ކަމަށްވެސް ޑރ.އަފްޒަލް ވަނީ ވިދާޅުވެފައެވެ.

މީގެ ކުރިން ، ޓީވީ ޕްރޮގްރާމެއްގައި ވާހަކަ ދައްކަވަމުން ވެސް ޑރ.އަފްޒަލް ވިދާޅުވީ ކޮވިޑާއެކު ތިންވަނަ އަހަރެއް ގުނަމުންދާއިރު، ފިޔަވަޅުތައް ހަރުކަށި ކުުރުމުގެ ބަދަލުގައި ކަމާބެހޭ ފަރާތްތަކުން ބޮޑަށް އިސްކަން ދެނީ ބައްޔާއެކު ދިރިއުޅެން ކަމަށެވެ.