އަސާސީ ކަންކަންކޮށްދިނުމަކީ ސަރުކާރުގެ މައްޗަށް ލާޒިމް ކަމެއް: އުޝާމް
ކޮންމެ ޕާޓީއަކަށް ތާއީދު ކުރިޔަސް އަސާސީ ކަންކަންކޮށްދިނުމަކީ ސަރުކާރުގެ މައްޗަށް ލާޒިމް ކަމެއް ކަމަށް ރައްޔިތުންގެ މަޖިލީހުގެ ވިލިމާލޭ ދާއިރާގެ އެމްއެންޕީ މެންބަރު އަޙްމަދު އުޝާމް ވިދާޅުވެއްޖެއެވެ.
އުޝާމް މިހެން ވިދާޅުވީ، ރައްޔިތުން މަޖިލީހުގެ ކޮމަންޑޫ ދާއިރާގެ ބައިއިލެކްޝަންގައި ވާދަކުރައްވާ އެމްޑީީޕީގެ ކެނޑިޑޭޓް މުޙައްމަދު ރާޝިދަށް ވޯޓް ނުދީފި ނަމަ އާސަންދައިގެ ޚިދުމަތް ދިނުމުގައި އެފަދަ ފަރާތްތަކަށް ދަތިކުރާނެކަމުގެ އިންޒާރު ޖުމްހޫރީ ޕާޓީގެ ލީޑަރު ޤާސިމް އިބްރާހީމް ދެއްވުމުންނެވެ.
އަންނަ މަހު ފަސްވަނަ ދުވަހު އޮންނަ މި އިންތިޚާބުގައި، އުޝާމް ނިސްބަތްވެ ވަޑައިގަންނަވާ، މޯލްޑިވްސް ނެޝަނަލް ޕާޓީ (އެންއެންޕީ)އިން ވެސް ކެނޑިޑޭޓަކު ވާދަ ކުރެއެވެ.
ޤާސިމަށް ރައްދު ދެއްވައި މިއަދު އުޝާމް ކުރެއްވި ޓްވީޓެއްގައި ވިދާޅުވީ، ސިއްޙީ ޚިދުމަތަކީ އެއްވެސް ތަފާތުކުރުމެއް ނެތި ކޮންމެ ރައްޔިތަކަށް ވެސް ދޭންޖެހޭ އަސާސީ ހައްގެއް ކަމަށާއި ކޮންމެ ޕާޓީއަކަށް ތާއީދު ކުރިޔަސް ރައްޔިތުންނަށް ކޮށްދޭންޖެހޭ އެންމެ އަސާސީ ކަންކަން ކޮށްދިނުމަކީ ސަރުކާރުގެ މައްޗަށް ލާޒިމް ކަމެއް ކަމަށެވެ. އަދި މިއަދު ފެނިގެން މިދަނީ އަސްލު ސިފަ ކަމަށް ވެސް އުޝާމް ވިދާޅުވިއެވެ.
ކޮވިޑްގެ ސަބަބުން ރައްޔިތުންގެ މަޖިލީހަށް ޙާޟިރުވެވަޑައިގަންނަވަން އުޒުރުވެރިވެ ހުންނެވުމަށް ފަހު ކުރެއްވި ފުރަތަމަ ދަތުރުފުޅުގައި އިއްޔެ ފޯކައިދުއަށް ވަޑައިގެން ދެއްކެވި ވާހަކަފުޅުގައި ޤާސިމް ވިދާޅުވީ އެމްޑީޕީގެ ކެނޑިޑޭޓް ރާޝިދަށް ވޯޓް ދޭން ޖެހޭ ކަމަށާއި ރާޝިދަށް ވޯޓް ނުދީ ލިބޭނެ މޮޅެއް ނޯންނާނެ ކަމަށެވެ. އަދި ރާޝިދަށް ވޯޓް ނުދެއްވާ ފަރާތްތަކަށް ސަރުކާރުން ދަތިކުރާނެކަމުގެ އިންޒާރު ދެއްވިއެވެ.
