ރައީސް ޔާމީންގެ ޝަރީއަތުގެ އަޑުއެހުމެއް މާދަމާ
ކުރީގެ ރައީސް , ރައީސް އަބްދުﷲ ޔާމީންގެ މައްޗަށް އުފުލައިފައިވާ ދައުވާތަކާ ގުޅިގެން ބާއްވާ ޝަރީއަތް މާދަމާއަށް ތާވަލުކޮށްފިއެވެ.
އެ ޝަރީއަތް ތާވަލު ކޮށްފައި ވަނީ މާދަމާ ހެނދުނު 9:30އަށް ކްރިމިނަލް ކޯޓުގައެވެ. މާދަމާ ބޭއްވުމަށް ތާވަލުކޮށްފައި ވަނީ ރިސޯޓެއް ތަރައްގީކުރަން ވ. އާރަށް ކުއްޔަށް ދޫކުރުމުގައި ރިޝްވަތު ނަގައި މަނީ ލޯންޑާ ކުރިކަމަށް ތުހުމަތު ކޮށްފައިވާ ދައުވާގެ އަޑުއެހުމެކެވެ.
މި މައްސަލައިގައި ރައީސް ޔާމީންގެ މައްޗަށް ދައުވާކުރަނީ ރިސޯޓް ތަރައްގީ ކުރުމަށް ޓަކައި އާރަށް ކުއްޔަށް ދޫކުރުމުގެ މުއާމަލާތުގެ ތެރެއިން އޭރުގެ ރައީސުލްޖުމްހޫރިއްޔާކަމުގެ މަގާމުގައި ހުންނަވައިގެން، މަގާމުގެ ނުފޫޒު ބޭނުންކޮށްގެން، ރިޝްވަތުގެ ގޮތުގައި އެއްމިލިއަން އެމެރިކާ ޑޮލަރު ނަންގަވައި އެ ފައިސާ ލޯންޑާ ކުރިކަމުގެ ތުހުމަތެވެ.
މި މައްސަލައިގައި ރައީސް ޔާމީންގެ އިތުރުން ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެމްބަރު ޔޫސުފް ނައީމްގެ މައްޗަށް ވެސް ވަނީ ދައުވާ އުފުލައިފައެވެ. އޭނާގެ މައްޗަށް އުފުލައިފައި ވަނީ ރިޝްވަތު ދިންކަމުގެ ދައުވާއެވެ.
