އުތުރު ތިލަފަޅަކީ އިންޑިއާގެ އަސްކަރީ މަރުކަޒެއް، އެއީ ސަރުކާރުގެ ބާރު ހިނގާ ތަނެއް ނޫން: ރައީސް ޔާމީން
އުތުރުތިލަފަޅުގައި މި ސަރުކާރުގެ ބާރު ނުހިނގާނެ ކަމަށާއި އެ ތަނަކީ އިންޑިއާގެ އަސްކަރީ މަރުކަޒެއް ކަމަށް ކުރީގެ ރައީސް، ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ރާއްޖޭގައި ތިބި އިންޑިއާ ސިފައިން ބޭރުކުރުމަށް ގޮވައިލައި ރ. މީދޫގައި މިއަދު ބޭއްވި ޖަލްސާގައި ބައިވެރިވެވަޑައިގެން ދެއްކެވި ވާހަކަފުޅުގައެވެ.
ރައީސް ޔާމީން ވިދާޅުވީ އުތުރުތިލަފަޅަކީ ދިވެހި ދައުލަތުގެ ބާރު ހިނގާ ތަނެއް ނޫން ކަމަށާއި އެތަނަކީ ފުރިހަމައަށް އިންޑިއާގެ އަސްކަރިއްޔާގެ ބާރުގެ ދަށުގައި އޮތް ތަނެއް ކަމަށެވެ. އަދި އުތުރުތިލަފަޅުގެ އެއްބަސްވުމަކީ ގާނޫނު އަސާސީއާ ހިލާފު އެއްބަސްވުމެއް ކަމަށް ވެސް ރައީސް ޔާމީން ވިދާޅުވިއެވެ.
“"އަޅުގަނޑު ބުނީމަ ގަބޫލުކުރައްވާ. މިއީ (އުތުރު ތިލަފަޅަކީ) ދިވެހި ސިފައިންގެ ދިވެހި ދައުލަތުގެ ބާރު ހިނގާ ތަނެއް ނޫން. މިއީ ސީދާ އިންޑިއާ ސިފައިންގެ ބާރު ހިނގާ ތަނެއް" ރައީސް ޔާމީން ވިދާޅުވިއެވެ.
މީގެ އިތުރުން ރައީސް ޔާމީން ވިދާޅުވީ އުތުރުތިލަފަޅު އެއްބަސްވުމުގައިވާ ގޮތުން އެތަނުގައި އިމާރާތް ކުރުމާއި މެނޭޖް ކުރުމާއި އަދި ހިންގުމުގެ ހުރިހާ ބާރެއް ވެސް އޮތީ އިންޑިއާގެ އަސްކަރިއްޔާއަށް ކަމަށެވެ. އަދި މިކަމަށް އަންނަ އިންޑިއާގެ އެއްވެސް ސިފައިންގެ އޮފިސަރަކާއި ވަކި ރޭންކެއް ނުވަތަ ވަކި އަދަދަކާ ގުޅޭ ގޮތުން ވެސް މި ސަރުކާރަށް ސުވާލު ކުރުމުގެ ބާރު ވެސް ނެތް ކަމަށް ވިދާޅުވިއެވެ.
“ދިވެހި ސަރުކާރުން ލަދުވެތިވާން ވާނެ މިވަރުގެ އެގްރީމަންޓެއް ސަރުކާރުގެ ނަމުގައި ކުރަން” ރައީސް ޔާމީން ވިދާޅުވިއެވެ.
“މި އެގްރީމަންޓްގައި މި އޮންނަނީ އިމާރާތް ކޮށްދީފައި މެނޭޖްކޮށްދީފައި އެޑްމިނިސްޗާ ކުރާނީ އިންޑިއާ ސިފައިންނޭ. އަދި މިކަމަށް އަންނަ އިންޑިއާގެ އެއްވެސް ސިފައިންގެ އޮފިސަރަކާ ވަކި ރޭންކަކާ ވަކި އަދަދަކާ ދިވެހި ސަރުކާރަށް އެއްވެސް ގޮތަކަށް ހުރަސް އެޅުމުގެ އިޚްތިޔާރެއް ނެތް” ރައީސް ޔާމީން ވިދާޅުވިއެވެ.
އުތުރު ތިލަފަޅު އެއްބަސްވުމުގައިވާ ގޮތުން އިންޑިއާގެ ފަންނީ މާހިރުން، ދިވެހި މުވައްޒަފުން ތަމްރީނު ކުރުމާއި، ޑޮކްޔާޑް އަދި ބަނދަރުގައި ޤާއިމުކޮށްފައިވާ އެކިއެކި ވަސީލަތްތައް މަރާމާތުކޮށް ބެލެހެއްޓުމުގައި 15 އަހަރު ދުވަހުގެ މުއްދަތަކަށް އިންޑިއާއިން އެހީތެރި ވެދޭނެއެވެ. އެ އެއްބަސްވުމުގައިވާ މިފަދަ ކަންކަން ތިލަވެފައި ވީ ނަމަވެސް އެ އެއްބަސްވުން ވަނީ ސިއްރުކުރެވިފައެވެ.
