ވައްޑެ ފައްޔާޒަށް: ޗެއާޕާސަންކަން ނުލިބެނީސް ގޯއްޗާއި ލޯނު ނުދެވެނީތޯ؟
އެމްޑީޕީގެ ޗެއާޕާސަންގެ މަގާމަށް ކުރިމަތިލައްވައިފައިވާ އިކޮނޮމިކް މިނިސްޓަރު ފައްޔާޒު އިސްމާއީލްއަށް ކަންކަން ކޮށްދެވެނީ، އެ މަގާމު ލިބުމުންތޯ، ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު(ވައްޑެ) ސުވާލު އުފައްދަވައިފިއެވެ.
އޭނާ މި ސުވާލު ކުރެއްވީ، ފައްޔާޒަށް ތާއީދު ކުރައްވައި، ހެންވޭރު ދެކުނު ދާއިރާގެ މެމްބަރު ހުސައިން ޝަމީމް(އަނދުން ހުސައިން) ކުރެއްވި ޓްވީޓެއް، ރީ ޓްވީޓް ކުރައްވަމުންނެވެ.
ފައްޔާޒާ އެކު ނަންގަވައިފައިވާ ފޮޓޯއެއް ހިއްސާ ކުރައްވައި އަނދުން ހުސައިން ވިދާޅުވީ ރައްޔިތުންނަށް ގޯއްޗާއި، ފްލެޓް ހޯދުމާއި، ވިޔަފާރި ލޯނުގެ އިތުރުން ބޭނުންވާ ތަރަައްގީ ހޯދުމަށް ސަރުކާރާ އެކު މަސައްކަތް ކުރުމަށް މިފަހަރު ފައްޔާޒަށް ތާއީދު ކުރުމަށް އޭނާ ނިންމަވައިފައިވާ ކަމަށެވެ.
"މަސައްކަތް ކުރާނީ ރައްޔިތުން ހޮވި ސަރުކާރާ އެކު." އޭނާގެ ޓްވީޓުގައިވެއެެވެ.
އަނދުން ހުސައިންގެ މި ޓްވީޓަށް ރައްދު ދެއްވައި ވައްޑެ ވަނީ ގޯއްޗާއި ފްލެޓާއި ވިޔަފާރި ލޯނު ދެވެނީ އެމްޑީޕީގެ ޗެެއާޕާސަންކަން ލިބުނީމަތޯ ސުވާލު ކުރައްވައި، ވަޒީރުކަމުގައި އެ ކަންކަން ނުކުރެއްވެނީތޯ އައްސަވައިފައެވެ.
އޭޕްރީލްމަހުގެ 16 ވަނަ ދުވަހު ބާއްވާ އެމްޑީޕީގެ ޗެއާޕާސަންގެ އިންތިހާބުގައި، ފައްޔާޒުގެ އިތުރުން ވާދަކުރައްވަނީ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ(އިންތި)އެވެ. މި އިންތިހާބަކީ ރައީސް އިބްރާހީމް މުހައްމަދު ސޯލިހާއި، ރައީސް މުހައްމަދު ނަޝީދާ ދެމެދު އޮތް ސިޔާސީ ވާދަވެރިކަން ވަަރަށް ބޮޑަށް ހާމަވާ އިންތިހާބެއްގެ ގޮތުގައި ގިނަ ބަޔަކު ދެކެއެވެ.
މިއީ ވަރަށް ހަޔާތްކުޑަ ދަރިއެއް