500އަށް ވުރެ ބޮޑު އާބާދީތަކުގައި އޭޓީއެމްގެ ޚިދުމަތް ފަށާނަން: ފައްޔާޒު
އާބާދީގައި 500އަށް ވުރެ ގިނަ މީހުން ދިރިއުޅޭ ހުރިހާ ރަށެއްގައި އޭޓީއެމްގެ ޚިދުމަތް ފަށްޓަވާނެ ކަމަށް އިކޮނޮމިކް މިނިސްޓަރ ފައްޔާޒު އިސްމާޢީލް ވިދާޅުވެއްޖެއެވެ.
ފައްޔާޒް މިފަދައިން ވިދާޅުވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ފާދިއްޕޮޅަށް ކުރައްވާ ދަތުރުފުޅުގެ ތެރެއިން އެ އަތޮޅު އޮޅުވެލިފުށީ ރައްޔިތުންނާ ބައްދަލުކުރެއްވުމަށް ބޭއްވެވި ޖަޒީރާ ހޮޅުއަށި ބައްދަލުވުމުގައި ވާހަކަފުޅު ދައްކަވަމުންނެވެ.
މިނިސްޓަރ ވިދާޅުވީ އޭޓީއެމްގެ ޚިދުމަތް ފެށުމުގެ މަޝްވަރާތައް ބީއެމްއެލްއާ އެކު ކުރިޔަށްގެންދާ ކަމަށެވެ. އަދި މި ހަފްތާގައި ބީއެމްއެލްގެ ބޯޑު މީޓިން ބޭއްވުމަށް ހަމަޖެހިފައިވާ ކަމަށާއި މިއަހަރު ތެރޭގައި ގިނަ ރަށްރަށުގައި އޭޓީއެމްގެ ހިދުމަތް ފެށިގެންދާނެ ކަމަށް މިނިސްޓަރ ވިދާޅުވިއެވެ.
“މި ހަފްތާގައި ބީއެމްއެލްގެ ބޯޑު މީޓިން އެބައޮތް އެކަމަށް މަޝްވަރާކުރުމަށް. އަދި މި އަހަރު ތެރޭގައި ގިނަ ރަށްތަކުގައި އެކަން ކުރެވޭނެ” މިނިސްޓަރ ފައްޔާޒް ވިދާޅުވިއެވެ.
މީގެ އިތުރުން، އާބާދީގައި 500އަށް ވުރެ ގިނަ މީހުން ދިރިއުޅޭ ހުރިހާ ރަށެއްގައި އޭޓީއެމްގެ ޚިދުމަތް ފެށުމަކީ ރައީސް އިބްރާހީމް މުޙައްމަދު ޞާލިޙްގެ ވިސްނުންފުޅެއް ކަމަށް ވެސް ފައްޔާޒު ވިދާޅުވިއެވެ.
“އާބާދީގައި 500އަށް ވުރެ ގިނަ މީހުން ދިރިއުޅޭ ހުރިހާ ރަށެއްގައި އޭޓީއެމްގެ ޚިދުމަތް ފެށުމަކީ ރައީސް ޞާލިޙްގެ ވިސްނުންފުޅެއް. އިރާދަކުރެއްވިއްޔާ މި އަހަރު ނިމޭއިރު ގިނަ ރަށްތަކުގައި އޭޓީއެމްގެ ޚިދުމަތް ފެށޭނެ” މިނިސްޓަރ ވިދާޅުވިއެވެ.
ފައްޔާޒު ވިދާޅުވީ ޅ.އަތޮޅަކީ ރިސޯޓްތައް ގިނަ އަތޮޅެއް ކަމުން އޮޅުވެލިފުށީގައި ވެސް ކައިރި މުސްތަޤްބަލެއްގައި އޭޓީއެމްގެ ހިދުމަތް ފެށޭނެ ކަމަށެވެ.
ގއ.ދާންދޫ ގާވެސް ބީ. އެމް . އެލް އޭޓީއެމް އެއް އެބަހުރި ހަރާންފަދަ އެއިން ރައިއްޔިތު މީހާއަށްވާކަމެއް، މިއަދުވެސް ރުފިޔާއެއް ނަގަން ދިޔާމާ އެކަމެއްނުވި!