ޕީޕީއެމްއިން ރިޔާސީ ކެނޑިޑޭޓަކު ދައްކާނެ، ޤާސިމަށް ފުރުސަތެއް ނެތް: ރައީސް ޔާމީން
ކުރިއަށް އޮތް 2023ގެ ރިޔާސީ އިންތިޚާބުގައި އިދިކޮޅު ޕީޕީއެމްގެ ތާއީދު ޣައްދާރުވެފައިވާ އެއްވެސް ސިޔާސީ ލީޑަރަކަށް ނޯންނާނެ ކަމަށް، އެ ޕާޓީގެ ލީޑަރު، ކުރީގެ ރައީސް، ރައީސް އަބްދުﷲ ޔާމީން އަބްދުލްޤައްޔޫމް ވިދާޅުވެއްޖެއެވެ.
އިންޑިއާ އަސްކަރިއްޔާއިން ރާއްޖޭގައި ތިބުމާ ދެކޮޅަށް އިދިކޮޅުން ހިންގަމުން ގެންދާ "އިންޑިއާ އައުޓް" ކެންޕެއިންގެ ތެރެއިން މިއަދު ގއ. ވިލިނގިއްޔަށް ވަޑައިގެން އެރަށު ރައްޔިތުންނާ ބައްދަލު ކުރައްވައި ދެއްކެވި ވާހަކަފުޅުގައި ރައީސް ޔާމީން ވިދާޅުވީ، އިންޑިއާ ސިފައިން މި ގައުމުގައި ބެއިތިއްބި ލީޑަރުންނަކީ ޤައުމަށް ޣައްދާރުން ކަމަށެވެ. އަދި، ޤާސިމަކީ އެފަދަ ފަރާތެއް ކަމަށާއި، ރައީސް ޔާމީން ޕީޕީއެމްގެ ލީޑަރުޝިޕްގައި ހުންނެވިހައި ހިނދަކު އެފަދަ ފަރާތްތަކަށް ޕީޕީއެމް ތާއީދު ނުކުރާނެ ކަމަށް ރައީސް ޔާމީން ވިދާޅުވިއެވެ.
ރައީސް ޔާމީން މިފަދައިން ވިދާޅުވެފައި ވަނީ، 2023ވަނަ އަހަރުގެ ރިޔާސީ އިންތިޚާބުގައި، ޕީޕީއެމުން ކެނޑިޑޭޓަކު ނުނެރޭނެ ކަމަށާއި އެންމެ ފަހު ވަގުތު ޕީޕީއެމްގެ ތާއީދު ލިބޭނީ ގާސިމް އިބްރާހިމަށް ކަމަށް ބުނެ ވާހަކަތައް ދައުރުވަމުންދާ ދަނޑިވަޅެއްގައެވެ.
މި ވާހަކަތަކަށް ރައްދު ދެއްވަމުން ރައީސް ޔާމީން ވިދާޅުވީ، 2023ގެ އިންތިޚާބުގައި ޕީޕީއެމްއިން ވާދަކުރާނެ ޤާބިލް ބޭފުޅުން ޕީޕީއެމް ޕީއެންސީގައި އެބަތިބި ކަމަށެވެ. އަދި އެ ޖާގަ އެހެން ޕާޓީއެއްގެ މީހަކަށް ދޭންޖެހޭ އެއްވެސް ފުރުސަތެއް ނެތްކަމަށް ވެސް ރައީސް ޔާމީން ވިދާޅުވިއެވެ.
ޕީޕީއެމްގެ ޓިކެޓެއް ޤާސިމަށް ނުލިބޭނެ. އެހެން ދައްކާ ވާހަކަ އެއްވެސް ރައްޔިތަކު ގަބޫލު ނުކުރާތި. ޕީޕީއެމް ޕީއެންސީ އޮތީ ބަދަހިކޮށް، މިޤައުމަށް ޣައްދާރުވި އެއްވެސް މީހަކަށް މިޕާޓީގެ ޓިކެޓެއް ނުލިބޭނެ. އަޅުގަނޑުމެން ނުދާނަން ޕީޕީއެމުން ނެރޭނެ ކެނޑިޑޭޓެއް ނެތިގެން ގާސިމް އިބްރާހިމް ނެރޭކަށް،
ޤާސިމަށް ވަރަށް ބޮޑަށް ފާޑު ވިދާޅުވަމުން ރައީސް ޔާމީން ވިދާޅުވީ، ޤާސިމަކީ ކޮވިޑަށް ބިރުން ފިލާ އޮތުމަށް ފަހު، އިންތިޚާބަކާ ދިމާވުމުން އެ ބިރު ވެސް ފިލައި ދިޔަ މީހެއް ކަމަށެވެ.
ރައީސް ޔާމީންގެ ވާހަކަފުޅުގައި އިންޑިއާ އަސްކަރިއްޔާ ރާއްޖެއިން ބޭރު ކުރަން ޖެހޭ ކަމަށް ވިދާޅުވާ ވިދާޅުވުން ތަކުރާރު ކުރެއްވިއެވެ.
