ގޯސްތައް ހަދާ މީހުންނަކީ ކޮބައިކަން ދިވެހި ރައްޔިތުންނަށް ވަރަށް ސާފުކޮށް އެނގޭ: ރައީސް ޔާމީން
މިއަދު ވެރިކަމުގައި ތިބުމަކީ ހިތަށް އެރިގޮތަކަށް ކަންކަން ކުރަން ލިބޭ ޖާގައެއް ނޫން ކަމަށާއި ގޯސްތައް ހަދާ މީހުންނަކީ ކޮބައިކަން ދިވެހި ރައްޔިތުންނަށް ވަރަށް ސާފުކޮށް އެނގޭ ކަމަށް ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
އިދިކޮޅު ޕްރޮގްރެސިވް ކޯލިޝަންގެ ފަރާތުން ގއ.ވިލިނގިލީގައި ބޭއްވި "އިންޑިއާ އައުޓް" ކެމްޕެއިންގައި ވާހަކަ ދައްކަވަމުން ރައީސް ޔާމީން ވިދާޅުވީ ވަގުންގެ ވާހަކަ ދައްކަން މިސަރުކާރުން ލަދު ގަންނަން ޖެހޭނެ ކަމަށެވެ.
ރައީސް ޔާމީން ވިދާޅުވީ، ކުރިއަށް އޮތް ރިޔާސީ އިންތިހާބު ރައްޔިތުންގެ އަޣްލަބިއްޔަތު ޕީޕީއެމްއަށް ލިބި، ވެރިކަމާ ހަވާލުވުމަށް ފަހު ފުރަތަމަ ވެސް ކުރާނެ ކަމަކީ، މިސަރުކާރުން ރައްޔިތުންނަށް ވެފައިވާ ޚިޔާނާތް ބެލުންކަމަށެވެ.
މި ޚިޔާނާތަކީ ރައްޔިތުންނަށް ބެލޭނެ ޚިޔާނާތެއްކަން ފާހަގަ ކުރައްވަމުން ރައީސް ޔާމީން ވިދާޅުވީ މިކަންކަމުގެ ހިސާބު ބެލި، ފިޔަވަޅު އަޅާނެ ކަމަށެވެ. އަދި ރާއްޖޭގެ މިނިވަންކަމަށް ބުރޫއަރާގޮތަށް ޤައުމުގެ މިނިވަންކަން ގެއްލުވައިލެވޭ ގޮތަށް ހެދިފައިވާ އެއްބަސްވުންތައް ރައްޔިތުންނަށް ހާމަކޮށް، މިގޯސްތައް ހަދައިފައިވާ މީހުންނާ މެދު ފިޔަވަޅު އެޅޭނެކަމަށް ވެސް ރައީސް ޔާމީން ވިދާޅުވިއެވެ.
މީގެ އިތުރުން ރައީސް ޔާމީން ވިދާޅުވީ، ކުރީ ސަރުކާރުގެ ބޭފުޅުންނާއި ދިމާލަށް އެމްޑީޕީން ވަގަށް ގޮވާއިރު، މިސަރުކާރުގައި ޚާއްސަކޮށް އެމްޑީޕީގެ އިސް މަޤާމުތަކުގައި ތިއްބެވި ބޭފުޅުންނާއި، މަޤާމުތަކުގައި ތިބި ބޭފުޅުންގެ ތެރޭގައި ގިނައީ މިފަދަ ތުހުމަތު ކުރެވޭ މީހުން ކަމަށެވެ.
Ads by STO
