ކުއްތާއާ ވަކީން ގައުމަށްދާން ދެކޮޅު ހެދި އިންޑިއާ ދަރިވަރަށް އެންމެ ފަހުން ގައުމަށް ދެވިއްޖެ

ގެންގުޅޭ ކުއްތާއާ ވަކީން އަނބުރާ ގައުމަށްދާން ދެކޮޅު ހެދި އިންޑިއާގެ ދަރިވަރު ރިޝްބާހް ކޯޝިކަށް، އެންމެފަހުން ކުއްތާއާ އެކު ގައުމަށް އާދެވިއްޖެއެވެ.
ރަޝިއާގެ އަސްކަރިއްޔާއިން ޔޫކްރޭނަށް އަރައި ދެމުންގެންދާ ހަމަލާތަކުގެ ސަބަބުން ޔޫކްރޭންގައި ތާށިވި އިންޑިއާ ދަރިވަރުންގެ ތެރެއިން 207 ދަރިވަރުންނާ އެކު ކޯޝިކް، އޭނާ ގެންގުޅޭ ކުއްތާ ގޮވައިގެން ގައުމަށް އެނބުރި ދިޔައީ މި ދިޔަ ބުދަ ދުވަހުއެވެ. އެމީހުން ގެންދިޔައީ ޕޮލެންޑްގެ ރިޒެޒޯވގެ މަގުންނެވެ.
އިންޑިއާގެ ޔޫނިއަން މިނިސްޓަރ ވީ.ކޭ ސިންގު މިކަން ހާމަކޮށް ، ކޮށްފައިވާ ޓްވީޓެއްގައި ބުނެފައި ވަނީ ޔޫކްރޭނުން އަނބުރާ ގައުމަށް ގެންދެވުނު މީހުންގެ ތެރޭގައި ހަތަރުފައިލީ އެ މީހުންގެ އެންމެ ގާތް ރަޙުމަތްތެރީން ވެސް ހިމެނޭ ކަމަށެވެ.
ކޯޝިކަކީ ޚާކިވްގެ ޚާކިވް ޔުނިވަރސިޓީ އޮފް ރޭޑިއޯ އިލެކްޓްރޯނިކްސްގައި އިންޖިނިއަރިން ކިޔަވަމުންދާ ދަރިވަރެކެވެ.

ކޯޝިކް:އޭނާގެ ކުއްތާއާ އެކު
މީޑިއާތަކަށް މައުލޫމާތު ދެމުން ކޯޝިކް މީގެ ކުރީން ބުނެފައި ވަނީ ކުއްތާއާ އެކު އިންޑިއާއަށް ދިޔުމަށް ވަރަށް ގިނަ މަސައްކަތްތަކެއް ކުރެވިއްޖެ ކަމަށާއި ނަމަވެސް އެކަމަށް ހައްލެއް ލިބިފައި ނުވާ ކަމަށެވެ. އެގޮތުން ޖަނަވާރުންގެ ކަންތައްތައް ބަލަހައްޓާ އިންޑިއާގެ އިދާރާއާއި ޔޫކްރޭންގައި ހުންނަ އިންޑިއާގެ އެމްބަސީއާ ވެސް މިކަމާ މަޝްވަރާ ކުރެވިއްޖެ ކަމަށާއި އެމީހުން އެދެނީ ޓިކެޓާއި އިތުރު ލިޔެކިޔުންތައް ހުށަހެޅުމަށް ކަމަށް އޭނާ ބުނެފައި ވެއެވެ.
އިންޑިއާގެ އެއާ ސްޓާފްގެ ޗީފް އެ ގައުމުގެ މީޑިއާތަކަށް މައުލޫމާތުދެމުން ބުނެފައި ވަނީ ޔޫކްރޭންގައި ތިބި އިންޑިއާ ރައްޔިތުން އެނބުރި ގައުމަށް ގެނައުމަށް ހިންގާ "އޮޕަރޭޝަން ގަންގާ" ކާމިޔާބުކަމާ އެކު ކުރިއަށް ގެންދެވޭނެކަމުގެ ޔަގީންކަން އެބައޮތް ކަމަށާއި އިންޑިއާގެ ހުރިހައި ރައްޔިތުން އެނބުރި ގެންދާނެ ކަމަށެވެ. އެހެން ނަމަވެސް ޔޫކްރޭންގައި ތިބި ވަރަށް ގިނަ އަދަދެއްގެ ބަޔަކު ވަނީ އެމީހުން އަނބުރާ ގައުމަށް ގެންދިޔުމަށް ސަރުކާރުން އެކަށީގެންވާ މަސައްކަތެއް ނުކުރާކަމަށް ބުނެ ފާޑު ކިޔައިފައެވެ.