ރަޝިއާގެ ވިޔަފާރިވެރިންނަށް މަރުހަބާ ކިޔާތީ ރާއްޖެއަށް ފިޔަވަޅު އަޅަން ގޮވައިލާން ފަށައިފި
ރާއްޖޭއިން ރަޝިއާގެ ވިޔަފާރިވެރިންނަށް ފިޔަވަޅު އެޅުމުގެ ބަދަލުގައި، އެ މީހުންގެ ޔޮޓްތަކަށް މަރުހަބާ ކިޔާތީ ރާއްޖެއަށް ފިޔަވަޅު އަޅައި، ބޮއިކަޓް ކުރަން ޓްވިޓަރގައި ބަޔަކު ގޮވަން ފަށައިފިއެވެ.
ފެބުރުއަރީ މަހުގެ 24ވަނަ ދުވަހު ވައިގެމަގުންނާއި ކަނޑުމަގުންނާއި އެއްގަމުން ޔޫކްރެއިނަށް ވަރުގަދަ ހަމަލާތަކެއް ދޭން ފެށުމުން ރަޝިޔާއާ ދެކޮޅަށް ހުޅަނގުގެ ގިނަ ޤައުމުތަކުން ވަނީ ދަތިކުރުމުގެ ހަރުކަށި ފިޔަވަޅުތަކެއް އަޅައިފައެވެ. އޭގެ ތެރޭގައި، ވިލާތުގެ އިއްތިޙާދާއި އިނގިރޭސިވިލާތާއި އެމެރިކާ އަދި ކެނެޑާ ހިމެނެއެވެ. މީގެ އިތުރުން އޮސްޓުރޭލިޔާއިންނާއި ޖަޕާނުން ވެސް ވަނީ ރަޝިޔާއާ ދެކޮޅަށް ދަތި ކުރުމުގެ ފިޔަވަޅު އަޅައިފައެވެ.
ރަޝިޔާގެ ބިލިޔަނަރުންގެ ޔޮޓްތައް ރާއްޖެއަށް މިސްރާބު ޖަހައިފައި ވަނީ، ރަޝިޔާގެ ކުންފުނިތަކާއި ވަކިވަކި ފަރުދުންނާ ދެކޮޅަށް އަޅަން ނިންމައިފައިވާ ފިޔަވަޅުތަކުގެ ދަށުން އެ ފަރާތްތަކުގެ ގެދޮރާއި ޔޮޓުތަކާއި ނުޙައްޤުން ހޯދައިފައިވާ މުދާ އަތުލާނެކަމުގެ އިންޒާރު ހުޅަނގުގެ ބޮޑެތި ބާރުތަކުން ދީފައި ވަނިކޮށެވެ.
ބޭރު މީހުންގެ މުދާ ހިފަހައްޓައި ތިންވަނަ ފަރާތަކާ ޙަވާލުކުރުމަށް ހުޅަނގުގެ އެއްވެސް ޤައުމަކާ އެކު ރާއްޖެއިން އެއްބަސްވުމެއްގައި ސޮއިކޮށްފައި ނުވާކަން ފާހަގަކޮށްލެވެއެވެ.
ރޮއިޓާސްއިން ރާއްޖެއަށް ގިނަ ޔޮޓްތަކެއް އަންނަ ކަމަށް ބުނުމުން، ޓްވިޓަރގައި ޚިޔާލުފާޅު ކުރި ޔޫރަޕްގެ ބައެއް މީހުން ވަނީ ރާއްޖެ ބޮއިކަޓް ކުރުމަށް ގޮވައިލައިފައެވެ.
"ހިނގާ ރާއްޖެއާ ދެކޮޅަށް ވެސް ފިޔަވަޅު އަޅަން. އެންމެ ފަހުން އަހަރެން ބެލިއިރު، ރާއްޖެއަކީ ހުޅަނގަށް ވަރަށް ބޮޑަށް ބަރޯސާވާ ޤައުމެއް" ޓްވިޓަރގައި ޚިޔާލުފާޅު ކުރި މީހަކު ބުންޏެވެ.
ރާއްޖެއާ ދެކޮޅަށް ފިޔަވަޅު އަޅަން ގޮވާތީ، އެކަމާ ދެކޮޅު ބައެއް މީހުން ވެސް ތިއްބެވެ.
"ރަޝިޔާގެ ބިލިޔަނަރުން ތިބީ އެމެރިކާގައި، އެމެރިކާއިން އެމެރިކާއަށް ފިޔަވަޅު އަޅަން ވިސްނާ، މާ ރަނގަޅުވާނެ" ޓްވިޓާގައި ޚިޔާލުފާޅު ކުރި އިތުރު މީހެއް ބުންޏެވެ.
ރަޝިޔާއަކީ ރާއްޖެއަށް ގިނަ އަދަދެއްގެ ފަތުރުވެރިން އަންނަ ޤައުމެކެވެ. މިދިޔަ ފެބްރުއަރީ މަހު ވެސް ރާއްޖެއަށް އެންމެ ގިނައިން ފަތުރުވެރިން އައިސްފައި ވަނީ ރަޝިޔާއިންނެވެ.
ޔޫކްރެއިނަށް ދެމުންދާ ޙަމަލާތައް ހުއްޓައިލައި އެ ޤައުމުން ރަޝިޔާގެ ފައުޖުތައް ފޭބުމަށް ގޮވައިލައި އދގެ ޢާއްމު މަޖިލީހުން ފާސްކުރި ޤަރާރަށް ރާއްޖެއިން ވަނީ ތާއީދުކޮށްފައެވެ. މި ޤަރާރަށް އަވައްޓެރި އިންޑިއާ، ލަންކާ އަދި ބަންގާޅުން ތާއީދުކޮށްފައެއް ނުވެއެވެ.
މަރުހަބާ ކިޔުމުން އޯކޭ!!!