ފައްޔާޒްގެ ކެމްޕެއިން ފުޅާކޮށް، މިއަދު 15 ރަށެއްގައި ހަރަކާތްތައް ހިންގައިފި
ވެރިކަން ކުރާ އެމްޑީޕީގެ އެތެރޭގެ އިންތިޚާބުގައި އެ ޕާޓީގެ ޗެއާޕަރސަން ކަމަށް ވާދަ ކުރައްވާ ފައްޔާޒް އިސްމާއިލްގެ ކެމްޕެއިން ހަރަކާތްތައް ވަރުގަދަކޮށް، މިއަދު 15 ރަށެއްގައި ކެމްޕޭން ހަރަކާތްތައް ބާއްވައިފިއެވެ.
"ހިންގާލަން" ނަމުގައި އިކޮނޮމިކް މިނިސްޓަރ ފައްޔާޒް ކުރިއަށްގެންދަވާ ކެމްޕެއިނު ޓީމުން ބުނީ ފައްޔާޒާއި އަންހެނުންގެ ރޫހުގެ ރައީސާ ކަމަށް ކުރިމަތިލައްވައިފައިވާ އައްޑޫ މީދޫ ދާއިރާގެ މެންބަރު ރޮޒައިނާ އާދަމަށް ތާއީދު ހޯދުމުގެ މަސައްކަތްތައް މިއަދު 15 ރަށެއްގައި ކުރިއަށްދިޔަ ކަމަށެވެ.
މި ހަރަކާތްތައް ހިންގައިފައި ވަނީ ހއ.އަތޮޅުން ކެލަޔާއި ވަށަފަރު އަދި ފިއްލަދޫއާއި ދިއްދޫގައެވެ. މީގެ އިތުރުން މ.އަތޮޅުން ދިއްގަރާއި ރަތްމަންދުއާއި ވޭވަށް އަދި މ.މުއްޔާއި ލ. ގަމުގެ އިތުރުން ގއ އަދި ގދ އަތޮޅުގައި ވެސް ކެމްޕެއިން ހަރަކާތްތައް ކުރިއަށް ގެންގޮސްފައިވާ ކަމަށް މައުލޫމާތު ދީފައިވެއެވެ.
ތާއީދު އިތުރުކުރުމުގެ މަސައްކަތް ކުރުމަށް މިނިސްޓަރ ފައްޔާޒާއި ރޮޒައިނާ އަދި ކެމްޕެއިން ޓީމު މި ވަގުތު ތިބީ އައްޑޫގައެވެ. އެ ޓީމުން މިއަދު ވަނީ ހިތަދޫ ދެކުނު ދާއިރާގެ ކެމްޕެއިން ޓީމުތަކާ ބައްދަލުކޮށްފައެވެ. އަދި ހިތަދޫ މެދު ދާއިރާގެ ކެމްޕެއިން ޓީމާ ވެސް މިނިސްޓަރު ފައްޔާޒު ވަނީ ބައްދަލު ކުރައްވައިފައެވެ.
މިނިސްޓަރ ފައްޔާޒަށް ތާއީދު ހޯއްދަވަން ހުވަދޫގައި ކުރި ކެމްޕެއިނު ޓީމުގައި އިސްކޮށް ހުންނެވީ ފިނޭންސް މިނިސްޓަރު އިބްރާހިމް އަމީރެވެ.
Ads by STO
