ދައުލަތުގެ ބަޖެޓުން ވިޔަސް 6 ރަށުގައި އެއާޕޯޓު އަޅާނަން: އަސްލަމް
ރާއްޖޭގެ ހަ ރަށެއްގައި އަޅަން ނިންމައިފައިވާ އެއާޕޯޓުތަކުގެ މަސައްކަތް، ދައުލަތުގެ ބަޖެޓުން ފައިސާ ހަރަދުކޮށްގެން ކުރަން ޖެހުނު ނަމަވެސް ކުރާނެ ކަމަށް ޕްލޭނިން މިނިސްޓަރު މުހައްމަދު އަސްލަމް މިއަދު ރައްޔިތުންގެ މަޖިލީހުގައި ވިދާޅުވެއްޖެއެވެ.
އަސްލަމް މިފަދައިން ވިދާޅުވީ މިއަދު އޮތް ރައްޔިތުންގެ މަޖިލީހުގެ ޖަލްސާގައި ވިލުފުށީ ދާއިރާގެ މެންބަރު ހަސަން އަފީފު ކުރެއްވި ސުވާލަކަށް ޖަވާބު ދެއްވަމުންނެވެ.
އަސްލަމް ވިދާޅުވީ އިއުލާނުކޮށްފައި އޮތް ހަ އެއާޕޯޓުގެ މަސައްކަތް ކުރިއަށް ގެންދަވާނެ ކަމަށާއި އެއް މޮޑެލް ފެއިލް ވެއްޖެއްޔާ އަނެއް މޮޑެލްއަކަށް ގެންގޮސްގެން ނަމަވެސް އެކަން ކުރައްވާނެ ކަމަށެވެ.
“"އެއްމޮޑެލެއް ފެއިލްވެއްޖެއްޔާ، އަނެއް މޮޑެލަށް ގެންގޮސްގެން ވެސް، އިއުލާންކޮށްފައިވާ ހަ އެއާޕޯޓުގެ މަސައްކަތް އަޅުގަނޑުމެން ކުރިއަށް ގެންދާނަން" އަސްލަމް ވިދާޅުވިއެވެ.
ކްރޮސް ސަބްސިޑީ މޮޑެލްގެ ދަށުން ރާއްޖޭގެ ހަ ރަށެއްގައި ޑޮމެސްޓިކް އެއާޕޯޓްތަކެއް ތަރައްގީ ކުރާނެ ނުވަތަ ތަރައްގީކުރަން މާލީ އެހީވާނެ ބަޔަކު ހޯދަން ޕްލޭނިން މިނިސްޓްރީން އިއުލާންކޮށްފައި ވަނީ މިދިޔަ އަހަރުގެ ޑިސެމްބަރު މަހުގެ ތެރޭގައެވެ.
ޑޮމެސްޓިކް އެއާޕޯޓް އެޅުމަށް ހަމަޖެހިފައިވާ ސަރަހައްދުތަކަކީ، ބ. ތުޅާދޫ، ށ. ބިލަތްފަހި، ތ. ވިލިފުށި، ހދ. މަކުނުދޫ، ފ. މަގޫދު އާއި ރ. އަތޮޅުގެ ދެކުނު ބިތުން ރަށެކެވެ. މީގެ ތެރެއިން ރ. އަތޮޅު ދެކުނު ބިތުން ރަށެއް ކަމަށް ބުނެފައި ވާއިރު އަދި އެއީ ސީދާ ކޮން ރަށެއްކަން ކަނޑައަޅައިފައި ނުވާކަމަށް ޕްލޭނިން މިނިސްޓްރީން ވަނީ ބުނެފައެވެ.
