"ރައީސް ޔާމީނަކީ މިނިވަންކަމަށް ކުރިމަތިވާ ކޮންމެ ގޮންޖެހުމަކާ ކެރިގެން ކުރިމަތިލައްވާނެ ބޭފުޅެއް"
ރައީސް އަބްދުﷲ ޔާމީން އަބްދުލްގައްޔޫމަކީ ދިވެހި ގައުމުގެ މިނިވަންކަމަށް ކުރިމަތިވާ ކޮންމެ ގޮންޖެހުމަކާ ކެރިގެން ކުރިމަތިލައްވާނެ ބޭފުޅެއް ކަމަށް ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
އަބްދުއްރަހީމް މިހެން ވިދާޅުވެފައި ވަނީ ޅ.ނައިފަރުގައި އިއްޔެ ކުރިއަށް ގެންދިޔަ "އިންޑިއާ އައުޓް" ހަރަކާތުގައި ބައިވެރިވެވަޑައިގެން ދެއްކެވި ވާހަކައިގައެވެ.
އޭނާ ވިދާޅުވީ ރައީސް މުހައްމަދު ނަޝީދު ވިދާޅުވި ފަދައިން، ރާއްޖޭގައި ތިބި އިންޑިއާ ސިފައިން ބޭލުމަށް ޓަކައި ކުރިއަށް ގެންދާ "އިންޑިއާ އައުޓް" ހަރަކާތަކީ ރައީސް ޔާމީން ކުރައްވާ "ނުރައްކާތެރި" މަސައްކަތެއްކަން، އިދިިކޮޅަށް ވެސް އެނގޭ ކަމަށާއި، އެ ނުރައްކަލާ އެ މަނިކުފާނު ކުރިމަތިލައްވަނީ ގައުމުގެ ހައްގުގައި ކަމަށެވެ.
"ރައީސް ޔާމީންގެ ގާބިލުކަން ހުންނާނެ، މި ގައުމުގެ ފަސްގަނޑުން އިސްލާމްދީން ނޫން އެހެން ދީނަކަށް ފުރުސަތު ނުދޭން. ރައީސް ޔާމީން މި ގައުމާ ދޭތެރޭގައި ގެންގުޅުއްވާ ތަސައްވުރެއް. އެއީ މި ގައުމުގެ ހުރިހައި ކަމެއްގެ ބާރު، އޮންނާންވާނީ ދިވެހި ރައްޔިތުންގެ އަތުގައި ކަމަށް އެ މަނިކުފާނު ގަބޫލު ކުރައްވަނީ." އަބްދުއްރަހީމް ވިދާޅުވިއެވެ.
އިންޑިއާ އައުޓް ހަރަކާތަށް ތާއީދު ނެތް ކަމަށް، ސަރުކާރަށް ތާއީދު ކުރާ ފަރާތްތަކުން ބުނެއެވެ. އެވާހަކަައަށް ރައްދު ދެއްވައި އަބްދުއްރަހީމް ވަނީ ޅ.ނައިފަރުން ވެސް، އިންޑިއާ ސިފައިން ބޭލުމަށް ކުރާ ތާއީދު، އެ ފަރާތްތަކަށް ނުފެންނަނީތޯ އައްސަވައިފައެވެ.
މީގެ އިތުރުން، އަބްދުއްރަހީމް ވަނީ ޕީޕީއެމުން، ބައި-އިލެކްޝަންތަކުގައި ވާދަ ކުރާތީ ހައިރާންވެވަޑައިގަންނަވާ ކަމަށް ރައީސް ނަޝީދު ވިދާޅުވެފައި ވާތީ، އެ މަނިކުފާނަށް ވެސް ބަހުގެ ހަމަލާއެއް ދެއްވައިފައެވެ. އެގޮތުން އެމްޑީޕީގެ ތެރޭގައި ދެ ފެކްޝަން އޮތްއިރު، ރައީސް ނަޝީދު އެ ޕާޓީގެ ކެނޑިޑޭޓަކަށް ތާއީދު ހޯއްދެވުމަށް ނުކުންނެވުމަކީ ވެސް ހައިރާންވެވަޑައިގަންނަވާ ކަމެއް ކަމަށް އަބްދުއްރަހީމް ވިދާޅުވިއެވެ.
