ނަޝީދަކީ އެމްޑީޕީގެ މޫނުމަތި، ނަޝީދާ ނުލައި ކާމިޔާބު ކުރެވޭނެ އިންތިޚާބެއް ނޯންނާނެ: ވައްޑެ

އެމްޑީޕީގެ ރައީސް، ރައީސް މުޙައްމަދު ނަޝީދަކީ އެމްޑީޕީގެ މޫނުމަތިކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެންބަރު މުޙައްމަދު ވަހީދު (ވައްޑެ) ވިދާޅުވެއްޖެއެވެ.

Ads by Hajj Corporation

ވައްޑެ މިހެން ވިދާޅުވެފައި ވަނީ ސަންގު ޓީވީން ރޭ ގެނެސްދިން ޕްރޮގްރާމެއްގައި އެމްޑީޕީގެ އެތެރޭގެ އިންތިޚާބާ ބެހޭ ގޮތުން ވާހަކަ ދައްކަވަމުންނެވެ.

އެމްޑީޕީން ރައީސް ނަޝީދު ބޭރުކޮށްލަން އުޅޭ ކަމަށް ޚުދު ރައީސް ނަޝީދު ވިދާޅުވެފައިވާ މި ދަނޑިވަޅުގައި، ވައްޑެ ވިދާޅުވީ، އެމްޑީޕީން ނަޝީދު އެއްފަރާތް ކުރަން ބޭނުންވާ ބަޔަކު އެބަތިބި ކަމަށެވެ. އެ ގޮތަށް އެކަން ކުރަން ބަޔަކު ބޭނުން ވަނީ ސަރުކާރުގެ ތެރެއިން ހިނގާ ސިއްރު ކަންކަމާއި، ކޮރަޕްޝަންގެ ކަންކަން ހިންގަން މަސައްކަތް ކުރައްވާ ފަރާތްތަކަށް ރައީސް ނަޝީދަކީ ބިރަކަށް ވެފައި ވާތީ ކަމަށެވެ.

ދާދި ފަހުން ރައީސް ނަޝީދު ވަނީ ސަރުކާރުގެ އެކި މަގާމުތަކުގައި ތިއްބެވި އިސް ބޭފުޅުން އެ މަނިކުފާނު ޕާޓީން ބޭރުކުރަން އުޅޭ ކަމަށް ތުހުމަތުކޮށް، އެމްޑީޕީގެ ޤައުމީ މަޖިލީހުގެ ވަޓްސްއަޕް ގްރޫޕަށް މެސެޖެއް ފޮނުވައިފައެވެ.

"ކޮރަޕްޝަނާއި ފަސާދައިގެ ކަންކަން ހިންގަވާލައްވަން ބޭނުންފުޅުވާ، އެ ވިސްނުމުގައި ތިބޭ މީހުންނަށް ވަރަށް އުނދަގޫވާނެ، ތުރާވާނެ ރައީސް ނަޝީދު ހުންނަވަންޏާ. އެހެންވީމަ ރައީސް ނަޝީދު އެއްފަރާތް ކުރުމުގެ މަސައްކަތް އެ ބޭފުޅުން ބާރަށް ކުރޭ." ވައްޑެ ވިދާޅުވިއެވެ.

އިންތިގެ ކެމްޕޭނު ޓީމުގެ ތަރުޖަމާނުކަން ވެސް ކުރައްވަމުން ގެންދަވާ ވައްޑެ ވިދާޅުވީ ނަޝީދަކީ އެމްޑީޕީގެ މޫނުމަތި ކަމަށާއި އަދި ޕާޓީގެ ކެމްޕޭނުތަކުގެ އިންޖީނު ކަމަށެވެ. އަދި ނަޝީދު އެއްފަރާތްކޮށްގެން ލިބޭނެ ރިޔާސީ އިންތިޚާބެއް، މަޖިލީހުގެ އިންތިޚާބެއް އަދި ކައުންސިލް އިންތިޚާބެއް ވެސް ނޯންނާނެ ކަމަށް ވައްޑެ ވިދާޅުވިއެވެ.

އަންނަ މެއި މަހު އޮންނަ އެމްޑީޕީގެ ޗެއަރޕާސަންގެ އިންތިޚާބާ ގުޅިގެން އެމްޑީޕީގެ އެތެރޭގައި ވަރަށް ބޮޑަށް ވަނީ ބައިބައިވުން އުފެދިފައެވެ. ވައްޑެގެ ވާހަކަފުޅުގައި ވެސް، މި އިންތިޚާބުގައި ދެން ވާދަ ކުރައްވާ އިކޮނޮމިކް މިނިސްޓަރ ފައްޔާޒްގެ ޓީމަށް ވަރަށް ބޮޑަށް ފާޑު ވިދާޅުވިއެވެ. އަދި އެ ޓީމުން ގެންގުޅެމުން އަންނަނީ އެމްޑީޕީގެ އަސްލު ގޮތް ނޫން ކަމަށް ވިދާޅުވިއެވެ.

"ވޯޓް ދަންމާކަަށެއް، ވޯޓް ފޮށީގައި ބަނޑު އަޅާކަށެއް އެމްޑީޕީގެ އަސްލު ފިކުރުގެ މީހަކު ނޫޅޭނެ" ޗެއަރޕާސަން އިންތިޚާބު ލަސްކުރަން ފައްޔާޒް ޓީމުން އެދިގެން އެކަން ކުރުމުން އެކަމަށް ފާޑު ވިދާޅުވަމުން ވައްޑެ ވިދާޅުވިއެވެ.