ސައީދަށް ދިމާވި އަނިޔާވެރި ގޮތުން، އަޅުގަނޑުގެ ހިތްފަޅައިގެން ގޮސްފި: ރައީސް ނަޝީދު
މިދިޔަ ހުކުރު ދުވަހު ބޭއްވި "އިންޑިއާ އައުޓް" ހަރާކާތުގެ ތެރެއިން ހައްޔަރުކުރި ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދާ މެދު އަމަލުކޮށްފައިވާ ގޮތުން ހިތްފަޅައިގެންދާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިފަދައިން ވިދާޅުވީ ފުލުހުންގެ ތެރޭގައި ގޯސްހަދާ މީހުން ތިބިކަމަށް ބަންޑާރަ ނައިބު މަޖިލީހުގެ ކޮމެޓީއެއްގައި ވިދާޅުވެފައި ވަނިކޮށް އެކަން މަޖިލީޙުގެ ޖަލްސާއެއްގައި ހޯމް މިނިސްޓަރ އިމްރާން ދޮގުކުރައްވާފައި ވާތީ ދެ ވަޒީރުންގެ ތެރެއިން އިތުރުފުޅު ހެއްދެވި ވަޒީރަކަށް ފިޔަވަޅު އެޅުމަށް ގޮވައިލައި މަޖިލީހަށް ހުށަހެޅި މައްސަލައިގައި މެމްބަރު ސައީދު ދެއްކެވި ވާހަކަފުޅާ ގުޅިގެންނެވެ.
ސައީދު ވިދާޅުވީ ހުކުރި ދުވަހު ބޭއްވި “ނޭވާހޮޅިއަށް” މުޒާހަރާއިން ހައްޔަރުކޮށް ޖަލަށް ގެންދިޔުމަށް ފަހު ފުލުހުން އަމަލުކޮށްފައި ވަނީ ވަރަށް އިހާނެތިކޮށް ކަމަށެވެ. އެގޮތުން ޖަލުގައި ހުރި ގޮޅީގެ ފާހާނައިގެ މަތީގައި ކެމެރާ ހަރުކޮށްފައި ހުރި ކަމަށާއި ހައްޔަރުކުރި 17 މީހުން އަތުރައިފައި ތިބީ “ބަކަރިކޮށްޓެއް”ކަހަލަ ތަނެއްގައި ކަމަށެވެ.
“އަޅުގަނޑުމެން ގެންގޮސް ބައިތިއްބައިފައި ހުރި ގޮޅިގެ ފާހާނައިގެ މަތީގައި ކެމެރާ ހަރުކޮށްފައި، އިމްރާނު ގެނައި އިސްލާހު މިއީ. ފާޚާނާ ތެރޭގައި މީހުންގެ އޮރިޔާން ބަލަންތޯ މި ކެމެރާ ހަރުކޮށްފައި މި ހުންނަނީ. މީތޯ އެމްޑީޕީގެ އެޖެންޑާ 19 ތަފާތުވާ ގޮތަކީ. ކޮން ހިއުމަންރައިޓްސްއެއްތޯ މީ. ގަޑިޖެހެންވާއިރަށް ފަނޑިޔާރެއްގެ ކުރިމައްޗަށް ގެންނަން ޖެހޭނެއޭ ބުނީމާ ބަކަރި ކޮށްޓެއް ކަހަލަ ތަނަކަށް ގެނެސް 8 ގަޑިއިރު ވަންދެން ޕްލާސްޓިކް ގޮނޑީގައި 17 މީހުން އަތުރައިލައިފައި ތިބީ” ސައީދު ވިދާޅުވިއެވެ.
ސައީދުގެ ވާހަކަތަކާ ގުޅިގެން ރައީސް ނަޝީދު ވިދާޅުވީ، ސައީދަށް ދިމާވި އަނިޔާވެރި ގޮތުގެ ސަބަބުން އެ މަނިކުފާނުގެ ހިތް ފަޅައިގެންދާ ކަމަށެވެ. އަދި 24 ގަޑިއިރު ގޮޅީގައި އިންނަން ޖެހުމާއި، ގޮނޑިއެއްގައި އެހައި ގިނަ އިރު ބައިންދައިފައި އިނުމުން އެކަމާ ހިތްފަޅައިގެން ގޮސްފައިވާ ކަމަށް ނަޝީދު ވިދާޅުވިއެވެ.
“އިއްޒަތްތެރި މެމްބަރަށް ތި ދިމާވި އަނިޔާވެރި ގޮތުގެ ސަބަބުން އަޅުގަނޑުގެ ހިތް ފަޅައިގެންދޭ. ތި ވިދާޅުވި 24 ގަޑިއިރު ގޮޅިގައި އިންނަވަން ޖެހިވަޑައިގަތުމާއި، ގޮނޑިއެއްގައި ބައިންދައިފައި އިނުމާއި، އަޅުގަނޑު ވެސް ހަމަ ހިތްފަޅައިގެންދިޔަ ތި ކަންކަމާ” ރައީސް ނަޝީދު ވިދާޅުވިއެވެ.
ހުކުރު ދުވަހު ކުރިއަށް ގެންދިޔަ "ނޭވާ ހޮޅިއަށް" އެއްވުމުގެ ތެރެއިން ހައްޔަރު ކުރި ފަރާތްތަކުގެ ތެރޭގައި ޕީޕީއެމްގެ ނައިބު ރައީސް އަދި ތ. ގުރައިދޫ ދާއިރާގެ މެންބަރު މުހައްމަދު ޣައްސާން މައުމޫން ވެސް ހިމެނެއެވެ. ސައީދާއި ޣައްސާން ހައްޔަރުކުރުމަށް ފަހު ބިޑިއަޅުވައިގެން ކޯޓަށް ހާޒިރުކުރުމުން ގިނަ ބައެއްގެ ފާޑުކިޔުން ވަނީ އަމާޒުވެފައެވެ.
ކަލޭ ތީ އެއްވެސް ކަހަލަ ޕްރޮފެޝަނަލް ކަމެއް ނެތް ލަޓޯފަޓޯއެއް. މަލާމާތާއި ފުރައްސާރައިގެ ބަހުރުވައިން ނޫނީ ވާހަކަ ދައްކަންވެސް ކަލޭ ނުދަނޭ. އެހެންވެ ކަލޭ ދެކެ ފޫހިވަނީ.