ރައީސް ނަޝީދާ ޚިޔާލު ބަދަލުވިޔަސް ފަހަތަށް ޖެހެވޭކަށް ނެތް: ފައްޔާޒް
ވެރިކަން ކުރާ އެމްޑީޕީގެ ރައީސް މުހައްމަދު ނަޝީދާ ޚިޔާލު ބަދަލު ވިޔަސް، އެމްޑީޕީގެ ޗެއާޕަރސަން ކަމަށް ވާދަކުރެއްވުމުން ފަހަތަށް ޖެހިވަޑައިގަނެވެން ނެތް ކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.
ޗެއާޕަރސަން ކަމުގެ ކެމްޕެއިނަށް މިއަދު ގއ. ފަރެސްމާތޮޑާއަށް ވަޑައިގެން، ކެމްޕެއިނު ޓީމާ ބައްދަލުކުރައްވައި މިނިސްޓަރ ފައްޔާޒް ވިދާޅުވީ ރައީސް ނަޝީދު ބާކީ ކުރަން ވެސް، އެކަހެރިކުރަން ވެސް އަދި ޕާޓީން ބޭރުކުރަން ވެސް އެއްވެސް ކަހަލަ ނިޔަތެއް ނެތް ކަމަށާއި މި މަސައްކަތް ފެށީ ރައީސް ނަޝީދުގެ ވެސް އެހީތެރިކަމާ އެކު ކަމަށެވެ.
"ދެން ޚިޔާލު ފަހުން ބަދަލުވީ. އަޅުގަނޑަކީ ސިޔާސީ މީހެއް. އިންތިހާބަކުން ބަލިވުމަކީ އަޅުގަނޑަށް މައްސަލައެއް ނޫން. ފަހަތަށް ޖެހުމަކީ އަޅުގަނޑަށް މައްސަލައެއް. އެހެންވީމަ ފަހަތަށް ޖެހެވޭކަށް ނެތް" މިނިސްޓަރ ފައްޔާޒު ވިދާޅުވިއެވެ.
ފައްޔާޒް އިތުރަށް ވިދާޅުވީ، އެމްޑީޕީގެ ޗެއާޕަރސަން ކަމަށް ހޮވިވަޑައިގެންފި ނަމަ، މަސައްކަތް ކުރައްވާނީ ޕާޓީގެ ރައީސާއި އިސް ލީޑަރާއި އަދި ރައްޔިތުންގެ މެމްބަރުންގެ އިތުރުން ދާއިރާގެ ރައީސުން އަދި ގޮފީ މެމްބަރުންނާއި އާންމު މެމްބަރުންނާ ވެސް އެއްކޮށް އެކައްޗެއް ކިޔައިގެން ޕާޓީ ކުރިއަށްގެންދަން ކަމަށެވެ.
