ވިޕްލައިނާ ޚިލާފުވެ އިދިކޮޅުން ބޭނުންވާ ގޮތަށް ވޯޓު ދޭތީ ކަންބޮޑުވޭ: އަސްލަމް
ވެރިކަން ކުރާ އެމްޑީޕީގެ ވިޕްލައިނާ ޚިލާފުވެ، އެ ޕާޓީގެ ބައެއް މެންބަރުން އިދިކޮޅު ފަރާތްތައް ބޭނުންވާ ގޮތަށް ވޯޓު ދެއްވާތީ ކަންބޮޑުވެވަޑައިގަންނަވާ ކަމަށް އެމްޑީޕީގެ ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމް މިއަދު ވިދާޅުވެއްޖެއެވެ.
އެމްޑީޕީގެ ސުޕަމެޖޯރިޓީ އެކުލެވިގެންވާ 65 މެންބަރުންނާ އެކު ރައްޔިތުންގެ މަޖިލީހުގެ އަޣްލަބިއްޔަތު އޮތް އެމްޑީޕީގެ ޕާލަމަންޓަރީ ގްރޫޕުގެ ބައެއް މެންބަރުން ގެންދަވަނީ މައްސަލަތަކުގައި ވިޕްލައިން ނެރެފައި އޮތަސް އިދިކޮޅުން ހުށަހަޅާ ގޮތަށް ވޯޓު ދެއްވަމުންނެވެ.
އެގޮތުން ރައްޔިތުންގެ މަޖިލީހުގެ މިހަފްތާގެ ދެ ޖަލްސާއެއްގައި އެމްޑީޕީގެ ބައެއް މެންބަރުން ވަނީ އިދިކޮޅު ޕީޕީއެމްއާއި ޕީއެންސީން ބޭނުންވާ ގޮތަަށް ވޯޓު ދެއްވައިފައެވެ. ފާހަގަވެފައިވާ ގޮތުގައި މަޖިލިސް މެންބަރުންގެ ތެރެއިން މިފަދައިން ވޯޓު ދެއްވައިފައި ވަނީ އެ ޕާޓީގެ ރައީސް މުހައްމަދު ނަޝީދާ އެކު ތިއްބެވި މެންބަރުންތަކެކެވެ.
މިކަމާ ގުޅޭ ގޮތުން އޮންލައިން ނޫހަކަށް މައުލޫމާތު ދެއްވަމުން މެންބަރު އަސްލަމް ވިދާޅުވީ އެމްޑީޕީގެ ޕީޖީ މެންބަރުންތަކެއް ވިޕްލައިނާ ޚިލާފުވުމަކީ ދެރަކަމެއް ކަމަށެވެ. ނަމަވެސް ދެ ވޯޓެއްގައި ވިޕާ ޚިލާފުވި މެންބަރުންނާ މެދު ފިޔަވަޅު އެޅުމުގެ ވިސްނުމެއް ނެތް ކަމަށް ވެސް އަސްލަމް ވިދާޅުވެފައިވެއެވެ.
